Ca Thianghlim Rel

Khrihfa mi hna nih Bible thiang kan i ngeih. Thlarau lei in a kan hruaitu hna nih Bible thiang rel leng mang dingin a kan cawnpiak hna. Zeicah tiah cun, a thianghlim mi Pathian he pehtlaihnak ngeih kan duh a si ah cun a thianghlim mi lam in kan kal a herh caah a si. Bible thiang cu Pathian thaw chuah hnawh mi a si caah thianhlimnak lam a kan phakter tu a si. Thlarau lei kong he pehtlai in kan rel mi ca hna nih Pathian duhnak lungthin a kan ngeihter pinah Pathian duh mi tuah ding le a nawl zulh duhnak lungthin thiang a kan ngeihter.

Mithiang Augustine nih, “Pathian he pehtlaih na duh a si ah cun ttha tein thlacam law a thianghlim mi ca hna zong rel hna. Thla kan cam tu Pathian sinah bia kan chim, bia kan ruah a si i kan thlarau caah a thianghlim mi ca kan rel cu Pathian nih bia a kan chawnh, bia a kan chimh a si” tiah a ti. Mithiang Jerome zong nih, “Bible thianghlim zei rel lo cu Pathian zei rel lo a si” (Ignorance of Scripture is ignorance of Christ-God)tiah a ti ve.

Bible thianghlim rel cu kan thinlung, kan ruahnak hna zong a thianhlim ter i kan nunnak ah tuah hnga ding mi rian zong a kan theihter. Tukforhtu thlarau ttha lo hlennak zong hrial khawh ning lam a kan hmuh sak i teinak lam ah a kan phaak ter. Bible thiang relnak thawngin a hmun mi vancung chawva duhnak a kan ngeihter i vawlei chawva he pehtlai mi duh hakkauhnak a zorter. Bible thianghlim relnak nih fimnak a kan ngeihter i taksa caah siseh, thlarau caah siseh tthanak tampi a kan pek.