Zumhnak

2Maccabees 7:1,20-31 chungah unau 7 hna le an nu cu siangpahrang tthalo nih a tlaih hna i an phunglam, Pathian nawlbia buar ter dingah a fial hna tikah an nunnak pek in Pathian phunglam le nawlbia an dirpi nak kong kan hmuh. Nu fa hna nih an i tinhmi le an i ruahchan mi cu vancung ram nuam kha a si. vancung nunnuamhnak co khawh ding caah taksa hremnak le thihnak hmanh an in ngamnak kong a si.

Luke thawngtha bia 19:11-28 chungah Jesuh nih khual a tlawng mi siangpahrang pa kong bianabia a chim. “Hi pa hi kan siangpahrang si awkah kan duh lo” tiin lamkal a hnu in an hei thlah hna tiah a ti(Lk 19:14). Minung ruahnak in cun siangpahrang pa nih hin “tihnung thil a tuah”(adventure) a tuah tiah kan ti khawh. Zeicah kan ti a si ah cun, amah uk nak a duh lo mi hna nih a siangpahrang sinak kha an rak lak khawh i a hung kir tik zongah a nunnak kha an lak khawh caah a si. Cu pin ah, “A kal hlanah a sal pahra kha a kawh hna i sui tangka phar khat cio a pek hna. Cun a thawh hna i, ‘Ka um lo karah hi hin chaw rak let u’ a ti hna”(Lk 19:13). Amah uknak a duh lo mi hna zong kha chaw rak let u tiah a fial fawn hna.

Maccabees cathiang chungah kan hmuh mi vancung ram nuam co khawh nak hnga ding caah thih a ngamh mi nu fa rual hna le a uknak a pennak a chia ta mi siangpahrang pa kong hi Khrihfa mi hna caah zohchunhawk tlak taktak an si. Hebrew catial tu pa nih, “Zumhnak ngeih kan ti hi, kan i ruahchanmi kan hmuh ttheo lai ti kan zumh le a taktak le a ngaingai a simi thil kan mit in kan hmuh khawh lomi hi an um ko ti kan zumh hi a si” tiah a ti(Heb 11:1).

Khrihfa kan sinak zongah pawngkam a ummi hna he kan ruahnak le kan zumhnak aa lawh lo tikah soiselnak a um ko lai. Siangpahrang pa uknak a duh lomi hna an um ko nain khual a tlawn nak in a hung kir tikah felfai tein a ummi a sal hna kha laksawng tampi a pek hna bang khan zeihmah tuah loin a tha a thu mi sal kha fakpi in dan a tat. Cu ve bangin nikhat vawlei kan nun caan a dih tikah Pathian cungah zumhfek tein le felfai tein kan um a si ah cun vancung ram nuam ah laksawng tampi pek kan si ve ko lai.