Pekchanhnak

Jesuh Khrih nih mi hmai ah an chawva ngeihmi langhter a hmangmi, ruamkai nak lungthin a ngeimi mirum hna le tangdornak lungthin he Pathian tihzah buin thawhlawm a petu a si a fak ngaingaimi nuhmeinu thawhlawm cuaithlai in a cawnpiak hna nak kong kha nihin ni caah Bupi nih ruah ti dingin a kan thim piakmi cathiang a si(Lk 21:1-4).

Pathian rianthiang tuannak zongah hin a parpavuan le a min sawhsawh in a tuan mi kan um. Pumpek in rian kan tuannak ah hin lungthin tak tein kan tuan ding caah Pathian nih a kan duh piak mi a si. Nuhmeinu nih cun thaizing le hmailei caah kaa chiah bang rih lai timi lungput ngeih loin “hi nu nih hin cun, a si a fak na tein, a nunnak ding ca i aa chiahmi kha pei a dihlak in a pek cu” tiah Jesuh khrih nih a ti(Lk 21:4). Hi nu nih a tuahser ning hi kan zoh tikah Jesuh Khrih nih kan caah aa pekchanh ning le a kan dawt ning kha kan hmuh khawh. Kan nih vialte hna zong kan i pekchanhnak ah hin sian dihnak lungthin he i pek, ttuan dingin Jesuh nih a kan duh pi mi a si.

Hruaitu a simi hna zong nih hakkauhnak lungthin an ngeih, midang zawn ruah thiam lonak lungthin an ngeih a si ahcun an hruai mi hna a rawk zau ko lai. Cun anmah lila zong an rawk zau ko lai.

Jesuh Khrih hnu zultu a simi hna, Bupi hruaitu a simi hna zong nih mah zawn lawng ruah loin dawtnak lungthin, Jesuh Khrih lungthin ngeih in Pathian rianthiang kan tuan a si ahcun, mi vialte zong an i lawm lai, Bupi zong aa lawm lai i Pathian zong aa lawm lai. “A nunnak ding ca i aa chiahmi kha pei a dihlak in a pek cu” tiah Jesuh nih nuhmeinu a thangthat bangin, kan nih hna zong nikhat Pathian nih a kan thangthat ve nak hnga ding caah mah duh-nun siloin Pathian duh ningin nung hna u sih.