Bia Ngaih, Bia Theih

“Bawipa, Bawipa,” tiah a ka timi paoh in Vancung Pennak chungah an lut dih lai, tinak a si lo, sihmanhsehlaw vancung i a ummi ka Pa nih tuah hna seh ti a duhmi a tuahmi lawnglawng kha an lut lai. Cucaah hi ka bia a thei i a zulmi cu lung cungah a inn a sami mifimpa bantuk a si. (Matt 7:21,24)

“Bia Ngaih timi le Bia Theih” timi biafang aa dan ning hi aho paoh nih kan i fian cio mi a si i fiang tein thleidan thiam zong a herh mi a si. Pakhat le pakhat bia kan i ruah tik hna ah hin ttha tei aa ngaih piak mi maw kan si aa theih piak sawh mi dah kan si?

Aw thawng pakhat theih timi cu kan ngaih mi nak in a har deuh ngai mi a si. Midang pakhat nih bia a kan chimh duh mi ttha tein kan ngaih piak hna  asi ahcun an bia chim ning siseh, an aw cawi ning siseh, an thinlung chungin an langhter duhmi hna kha ttha tein kan hngalh khawh. Kan pawngkam ah tlang au pa nih loudspeaker hmangin tlang a au mi aw thawng cu kan theih ko men lai. Sihmanhsehlaw ttha tein kan ngaih lo a si ah cun zei dah a aumi a si, zeidah a chim duhmi a si ti hngalh kawh lo a fawi.

Nifatin kan nunnak ah hin midang nih an chimmi bia hna hi a parpavuan in kan theih mi a tam deuh. Ttha tein bia kan i ngaih piak mi hna hi a tlawm ngai tawn.

Jesuh Khrih nih “ka bia a thei i a zulmi cu” tiah a ti. Jesuh nih a kan cawnpiak mi kha ttha tein kan ngaih a si ah cun a kan chimh duh mi kha fiang tein kan theih khawh ko lai. St. Benedict nih: “Nan lungthin in bia i ngaih piak u” tiah a ti.

Kan nih vialte hna zong nih pakhat le pakhat kan i chawnh nak ah siseh, ttha tein i ngaih piak hna u sihlaw i theih piak hna u sih. Pathian cawnpiak mi hna zong ttha tein ngai hna u sihlaw a kan chimh duhmi hna zong theih thiam i zuam hna u sih.