Minung le A Huham

(5) Minung huham ah a lngkhun mi hmelchunhnak

Pathian serka in minung timi cu zatlang phu chungah um dingin sermi asi. Minung nunnak kotho zong zatlang phu he petlainak a ngei. Minung huham i kotho nunnak cu midang he aa pehtlai mi asi fawn. Cucaah mikip cu vanrang tawi zatlang phu chungah nunawk a herh. Cutiin kan nun lawngah minung huham humhimnak pek khawh le khamh khawh a silai i vanrang tawi zatlang phu lawngah man a ngeimi nunnak kha serkhawh asi lai.

Minung huham he a pehtlai thiammi a langkhun mi hmelchuhnak kha phunthum (3) in `thenkhawh asi. Cuhna cu;
(A) Pathian he pehtlainak
(B) Minung le minung pehtlainak
(C) Sermi thilnung, kokek pawngkam he pehtlainak hna an si.

(A) Pathian he pehtlainak

Mikip cu Pathian muisam he aalo in sermi kan si caah kan nunnak zapi cu Pathian he aa pehtlai i amah leiah hoih ding asi. Mikip cu Pathian he aa hrawmmi asiloah hoikom an si awk asi. Vatican II tonpumhnak GS ah minung huham timi cu Pathian nih, kokek pawngkam ukding ah a sangbik reng le `tuanvo pek asi caah Pathian he i hawikom ding zongah kawh kan si. Cu kawh auhnak cung hngat in minung huham man a ngeihnak cu asi. Pathian nih minung kha a sem lawng siloin amah he zungzal in i hawikom ding zongah a tim tiah a ti.⁽²¹⁾  Cucaah mikip nih huham a ngeimi nunnak in nunkhawh awk caah sertu Pathian he pehtlaihnak ngeih a herh. Chim duhmi cu sertu kha a cohlan lai i Pathian biatak asiloah biaknak a duh lai. Sertu Pathian kha hrelh le biatak biaknak zei a rello mi hna cu annih an huham kha zorter awk le ngeihlo awk tuah mi asi.

Cuhnuah Vatican II tonpumhnak ah Pathian a zumlo mi hna i biaknak an alnak le Pathian zumhnak cu minung huham a zorter tiah sualpuhnak kha a phi pek`than awk ah a tanglei bantukin a phi an pek.

For God has called man and still call him so that with his entire being he might be joined to him in an endless sharing of a divine life beyond all corruption.⁽²²⁾
(Pathian nih, a nunnak dihlakin mikip kha rawhralnak vialte lonh in Amah i a thianghlim sunglawimi  nunnak kha dong kholo in tinco ve dingah a rak kawh auh i atu zongah a kan kawh auh peng).

Vatican II tonpumhnak ah Pathian zumhnak thawngin mah pum huham a zor lo. Amah zumhnak thawngin mah huham kha zohkhenh in iven cio asi. Cuticun mah le nunnak kha rawk khawh lo dingin zohkhenh kilven zungzal awk asi tiah a phi a pek. Minung huham timi cu sertu Pathian he i hawikomh `thannak, pumkhat sinak hna lawngah hrambunh in a dir i Pathian he lawngin a tling cikcek mi asi. Cucaah Pathian hlawtnak, biaknak ngeihlonak hna cu mah huham a zorter i minung man ngeihnak kha a uaiter⁽²³⁾ tiah fingtein a cawnpiak.

End Notes;

21. Second Vatican Council, <<Pastoral Constitution on the Church in the Modern World>>, Gaudium et Spes, (7 December 1965): AAS 58 (1966) no. 18a 19.

22. GS art. 18

23. GS art. 21

#Kan peh`than telai