A Kan Khamhtu cu Jesuh a si ko!

Jesuh timi min a sullam cu “Khamhtu, tlanhtu” tinak a si. “Emmanuel” timi sullam cu “Pathian kan sinah a um” tinak a si.

Jesuh Khrih a rak chuah lio ah a rak bia kho mi hna le a rak hmu hmasa bikmi hna cu lungthin thiang a ngeimi tuukhal hna le Arfi zohthiam hna an rak si. Jesuh Khrih thah dingin khua a rak khaang mi Herod siangpahrang le ruahnak a rak petu hna nih Jesuh Khrih kha Siangpahrang a sinak le Pathian a sinak kha an rak hmu kho lo.

Jesuh Khrih thawngtha bia a rak phuan lio caan zongah lungthin thiang a ngeimi hna nih a hnu an rak zulh i Pathian Fapa, Messiah “Tlanhtu le Khamhtu” a sinak kha an rak cohlaan. Sihmanhsehlaw, phungbia cawnpiaktu hna le a rawhral nak hnga ding caah khua a rak khaang mi hna nih Jesuh Khrih kha “Pathian Fapa sinak in siseh, tlanhtu le khamhtu a sinak in siseh” an rak hmu kho lo i an rak cohlaang kho lo. Zeicah kan ti a si ah cun lungthin ttha lo an rak ngeih caah a si.

Lungthin tha a ngeimi Jesuh Khrih cu minung vialte 100% khamh kan si nak hnga ding caah, vancung Pennak kan cokhawhnak hnga ding caah a tlau mi kan nih hna kha a kan kawl zungzal tu a si.

Matthew 18:12-14 chungah “Tuutlau kong” cawnpiak nak kan hmuh khawh. “Tlang cungah a tlongmi 99 cu a kaltak hna lai i a tlaumi cu a kawl lai. A hmuh tikah 99 a tlau bal lomi cung nakkhan hi tuu pakhat cungah hin aa lawm deuh” tiah a ti.

Jesuh Khrih nih amah le amah “Tuukhal tha cu keimah hi ka si”(Jn 10:11) tiah a ti. Kannih hna cu Amah tuurun kan si(Psalm 95:7) i Amah hnu zul kan si. Lam kan pial sual tik zongah zeitikhmanh ah a kan kal tak bal lo; a kan kawl tthan i kan himnak hmun ah a kan kirpi tthan zungzal ko.

Tuu timi hi saram dang hna nak in a molh deuh mi le a derhdorh deuh mi saram a si. Sehhmang sahrang hna kut in amah le amah aa khamh khawh lo caah tuukhal tu nih a zohkhenh peng a herhmi a si.

Kan nih hna zong tuu bantukin sehhmang sahrang Satan kut in kan mah le kan mah kan i khamh kho ve lo. “Khamhtu le tlanhtu Jesuh-Emmanuel Pathian kan sin ah a um” zungzal a herh ve. A kan khaltu Jesuh he kan i hlat sual a si ah cun thihnak lam kan panh ko lai. A kan khaltu Jesuh aw ngaih zungzal a herh. A kan hruainak lei ah kal zungzal hna u sih.

“Thawng ngai le raltha ngaiin um ko; na thinphang hlah, na lung zong dong hlah; zeicahtiah Bawipa na Pathian cu khuazeika na kalnak hmanh ah na sinah a um ko.”(Joshua 1:9)

Zeicahtiah Pathian nih, “Kan kaltak bal hna lai lo i kan hlaw bal fawn hna lai lo” a ti (Heb 13:5).

Jesuh nih: “Cun hihi philh hlah u: nan sinah a zungzal in, caan dongh tiangin ka um lai.”(Matt 28:20)