Jesuh Tipil innak

BAWIPA JESUH TIPIL INNAK PUAI

            Jesuh Khrih kum (30) tluk a si ahkhan Mithiang Johan Baptista cu Judea thetse ramah “Nan sualnak i ngaichih u! Pathian Pennak a nai cang” tiah au in a cawnpiak. Culioah Jerusalem, Judea le Jordan tiva kam um, mi tampi hna cu an sualnak kha an i ngaichih in Johan sinah an kal hnu ah Jordan tiva ah tipil an rak ing cio. Farasi mi le Sadusi mi tampi nih tipil in awkah an rat kha Johan nih a hmuh hna tikah, “Rul hna, Pathian thinhunnak a ra lio mi chung cun nan luat kho lai tiah aho nih dah an chimh hna. Nan sualnak nan i ngaihchihnak cu nan theitlai in langhter ngat u! Nan sualnak nan i ngaihchih cang ti hngalhnak ah kei nihcun, ti in tipilnak kan pek hna; Sihmanhsehlaw ka hnu in a ra lai ding pa nih cun Thiang Thlarau le mei in tipilnak an pek hna lai” tiah a chimh hna (Mt. 3:7-11).

            Cutikah Jesuh cu tipil in awk ah Galilee ram Jordan tiva pawng i Johan sinah a ra ve. Johan zong nih cun, “Keimah pei nangmah nih tipil pekawk ka si cu, ka sin ah nangmah leh tu na rat,” tiah a rak ti (Mt. 3:12-17). Tipilnak a in dih cangka cun Jesuh cu tichung cun a chuak. Van kha aa hung i Pathian Thlarau cu `thuro bantukin a rung zuang i a cung i aa fut kha a hmuh. Cun, Vancung in aw pakhat a rung thang i, “Amah hi ka dawtmi ka Fapa a si, Amah cungah hin ka lung a tling,” tiah a ti.

            Hibantukin tipil a in hnu ah Khrih cu a khamhnak thawng`tha kha mi tampi hmai ah a thawk colh. Kannih Khrihfa vialte zong nih Thiang Thlarau he hmunkhat in vawlei cung ramkip ah kal in Evangelic thawng`tha phuan awk `tuanvo (rian) kan cohlan ni, kan tipil innak ni sunglawi kha kan i theih `than a hau ve.