Lunglawmhnak

Mary nih Elizabeth a vatlawn lennak (Luke 1:39-44) kong hi a thianghlim mi tlawn lennak a si. Mary siseh, Elizabeth siseh an pahnih in an pawi mi nau hna cu Pathian sinin a ra mi an si. “Elizabeth nih Mary i a vun chawnhnak bia kha a theih tikah a paw chung i a fate cu a rak cawl. Elizabeth cu Thiang Thlarau in a khat i, aw thangpi in, ‘Nangmah cu nu vialte lakah thluachuak bik nu na si. Na hrin laimi na fa zong hi fa thluachuak a si’ tiah a ti”(Luke 1:41-42).

Zei ruangah dah Mary hi thluachuak bik nu a si hnga? A fiang ko, Pathian Fapa, Jesuh a nu a si caah a si. Canterbuty Archbishop a si mi Anselm (AD 1033-1109) nih : “Pathian Fapa loin zei thil hmanh an um khawh lo bantukin Mary loin zong khamhnak a um kho ve lo” tiah a rak ti.

Mary le Elizabeth an i ton tikah anmah pahnih lawng a nuam mi an rak si lo. Elizabeth paw chung i a um mi ngakchia tiang in aa rak i lawm: “Na ka biakchawnhnak ka theih cangka khan pei ka chung i ka fate cu lunglawmhnak in aa hlawh len cu”(Lk 1:44) tiah a ti. Mary nih a chawnh ruang lawngah siloin Pathian Fapa Jesuh Mary sinah a um caah pawngkam a um mi vialte hna tiangin lunglawmhnak a um nak hi a si.

Dawtmi u le nau hna Mary nih Jesuh aa ngeih bantukin kan nih Khrihfa mi hna zong nih Jesuh kan i ngeih ve a si ah cun, Jesuh kan sinah a um ve a si ah cun pawngkam a um mi vialte hna caah lunglawmhnak a chuahter khotu kan si zungzal cio ko hna lai.

Mary nih zei ruangah dah Jesuh a pawi, aa ngeih kan ti a si ah cun Pathian bia a ngaih ruangah a si(Lk 1:38). Kan nih hna zong Pathian bia kan ngaih (Lk 9:35) a si ah cun Jesuh bia zong kan ngaih awk a si. Jesu bia kan ngaih a si ah cun Pa Pathian bia kan ngaih a si( Lk 10:16). Pathian bia kan ngaih a si ah cun lunglawmhnak a um zungzal ko lai.