Jesuh Nih Mi A Damter Hna

Nihin ni caah Bupi nih ruah ti ding le thazaang lak ti dingin a kan thimpiak mi cathiang cu (Mark 1:29-39) a si i Jesuh Khrih nih mizaw mi hna le a dam lomi hna damnak a pek tthan hna nak kong a si. Nihin kan relmi cathiang aa thawh ningah Jesuh Khrih cu “pumhnak inn khan khuazei hmanh ah pialpah loin Simon le Andru inn ah khan an kal i Jeim le Johan zong kha an sinah cun an kal ve” tiah a ti. Jesuh cu Simon inn a phak cangka in Simon nupi nu a dam lo tiah an chimh. Jesuh nih a dam lomi nu cu a kut in a tongh tikah mi zaw nu nih damnak a hmuh than.

Zanlei, ni a tlak hnuah khan Jesuh sinah cun a zawmi vialte le khuavang nih a tuahmi vialte hna kha an ratpi hna tiah Mark nih a cathiang ah a langhter. Cun Jesuh nih zawtnak a phunphun in a zawmi mi tampi kha a damter hna i khuavang tampi kha a tthawl hna. A thaizing cu zingkate in, ni a chuah hlanpi ah, Jesuh cu a tho i khualeng hmunking ah thlacam awkah a kal.

Jesuh Khrih kan khua kan ram ah nihin rak phaan ve sehlaw a sin kal in kan dam lonak hna le kan zawtnak hna chungin damter kan si nak ding caah kan panh cio ve hna hnga maw? Cun zeibantuk kan dam lonak hna kha dah damter tthan dingin kan hal cio hna hnga? Jesuh phungchim mi kha teh kan khua ningpi in chuah hnawh in kan ngai cio hna hnga maw?

Nihin ni ah ruah ti dingin le Pathian sinah hal ti dingin sawm kan duh mi hna cu kanmah pumpak dam lonak damter tthan ding ca lawngah siloin a zaw cuahmah mi kan vawlei pi caah siseh, kan ram caah siseh, kan peng kan khua caah siseh Jesuh sinah damnak hal cio hna u sih. Pathian nih a kan theih piak hrimhrim ko lai. Pathian tthawnnak le a dawtnak cungah zumhnak fek ngei cio hna u sih. Lungsau tein hal hna u sihlaw hngak cio ko hna u sih.