Lung Awtawm loin Thlacam

Nikhat cu ngakchia unau pahnih lente an i celh ti a si. Pa ngakchia pa nih lungrang (marbles) dawh tete bawm khat in aa ngeih hna. Nu ngakchia nu te zong nih muthai (sweets) durkhat a ngeih ve ti a si. Pa ngakchia pa cu a farnu sinah a kal i, “Ka far, na muthai ngeih mi le ka lungrang ngeih mi i thleng u sih” tiah a hei ti. A farnu cu a lung a tling i an thil cu an i thleng ti a si.

Sihmanhsehlaw ngakchia pa nih khan a lungrang lak ah aa dawh bik le a nganbik kha a thli tein a thuh ziar ti a si. Zan ih caan a phanh tikah ngakchia pa te cu hngilh kho loin a um i khua a ruah mi cu, “Ka farnu nih a muthai pe dih loin a thup bang ve hnga maw?” tiah khua a ruat leng mang ti a si.

Farasi mi hna nih Jesuh thil ti khawhnak cungah zumh khawh dih loin hneksak an i timhnak kong hi nihin ni caah Bupi ruah ti dingin (Mark 8:11-13) a kan thimpiak mi cathiang a si. Jesuh nih an zumh lonak a hmuh tikah fak piin a hrum i, “Zeicahdah tu chan mi nih hin khuaruahharnak tuah nan ka fial? Ka tuah lai lo, cu bantuk hmelchunhnak cu tu chan mi hi ka pe hrimhrim hna lai lo,” (Mk 8:12) tiah a ti.

Minung aho kan si paoh ah zumh lo um caan ton khawh cio a si. Midang nih a kan zumh lo ning hi a phunphun in a ra kho mi zong a si. Zeiti a si hmanh ah midang cungah zumh lo timi cu suttung (goal,target) aa lo dih cio ko i, thil ti khawhnak ah dawnkhantu siding le lungdernak pek awk ah tinhmi lawngte an si ko. Farasi mi hna nih an lung chungin an i timh mi zong hi thiamthiam hi a si.

Nifatin kan nunnak ah siseh, harnak kan ton caan ah siseh, thla kan cam caan ah Pathian sinin khuaruahharnak thil kan hal bal cio ve hna maw? Kan thlacam Pathian sinin direct in kan hmuh lo caan ah Pathian thil ti khawhnak cungah kan zumhnak thazang a der bal sual maw?

Mithiang James nih, “Zeihmanh bau loin a tlingmi nan si nakhnga, a karlak ah ing kho loin um sual loin a dongh tiangin in ko u. Asinain thla nan cam tikah lung awtawm lo tein nan zumh hrimhrim lai. lung awtawm in a ummi cu thlichia nih a choihmi rili tilet bantuk a si. Cu bantuk mi nih cun, ka halmi kha Bawipa nih a ka pek lai, tiah a ruah awk a si lo; lung awtawm in a ummi cu an i tinhmi ah khan an kal ciahmah kho bal lo,” (James 1:4, 6-8) tiah a ti.