Patian cu Dawtnak a si

Jesuh nih cun, “ Bawipa na Pathian cu na lungthin dihlak le na ruahnak dihlak le na nunnak dihlak in na dawt lai… Na innpa cu nangmah naa dawt bantukin na dawt lai” tiah a ti. (Matt 22:37,39)

Jesuh Khrih nih thawngtha bia a chim lio ah a dawnkhaan tu le a do tu phu an rak um zungzal. Cu hna cu Farasi mi, Sadusi mi hna le phungbia cawnpiaktu hna hi an rak si. Mi tampi nih Jesuh cawnpiak nak an rak cohlaan ko nain hi phuthum hna nih hin an rak cohlang dih kho taktak lo. Jesuh phung chimnak chung tu in biafoih ding le a sual nak kawl ding lawngin an rak bawh zungzal tawn. Hi lungthin nih hin Jesuh Khrih zong vailam cung thih tiangin an rak phanhter taktak ve.

Jesuh cawnpiak ning le an cawnpiak ning hna zong aa lo fawn lo. Farasi mi hna cawnpiak nak ah cun misual mi hna, mi sifak hna le zohchuk a simi hna kha Pathian hmai ah le Pathian Pennak chungah luh ding in aa tlak lomi hmuh in an rak hmuh hna caah a si. Minung cu a sual a palh kho mi kan si ti cu Jesuh nih a theih ko; sihmahsehlaw minung thleidannak ngeih loin aho paoh kha a rak cohlaan hna i an zawtnak le an nganfahnak hna kha a damter ko hna.

Nihin kan theih mi cathiang (Matt 22:34-40) chungah Farasi mi pakhat nih Jesuh bia a hal nak kong kan hmuh. Jesuh Khrih cawnpiak nak ah cun Pathian nih a kan “Dawtnak le zangfahnak” hna hi a bik in kan hmuh khawh.

Pathian nih kan sin in aa ruahchan mi cu kan lungthin kan i thlen, kan sualnak kal tak in amah lei ah kan i mer tthan ding hi a si. Pathian nih a kan dawt bantukin midang cungah thlei dannak lungthin ngeih loin kan dawt ve hna ding hi a kan duh piakmi a si. Pathian nih a bia thiang in a kan cawnpiak nak hna le a kan kawhnak aw thawng kha theih in Pathian fa taktak si khawh dingah i zuam cio hna u sih.