Ka zumh ko, ka bawm tuah!

A caan ah cun Pathian he aa naih deuh bangin kan um tawn i a caan ah cun Pathian thawnnak le lianngannak kan philh thiam tawn. Pathian tawnnak le thil ti khawhnak kan zumh ko kan ti lio caan zongah kan thlacamnak cungah lung awtawm in kan um thiam tawn.

Nihin ni caah Bupi nih ruah ti dingin le thazang lak ti dingin a kan thim piakmi cathiang cu (Mark 9:14-29) a si i zultu hna nih thlarau thalo an thawl khawh lonak kong a si.

Thlarau thalo nih a tuahmi pa a pa Jesuh sinah a ra i bawmhnak a hal tikah Jesuh nih, “Na ka bawmh khawh ahcun na ti maw? Asi, zumhnak a ngeimi caah cun zeipaoh a si kho ko,” tiah a ti. Cun a pa cu a au i, “Ka zumh ko, sihmanhsehlaw a za lo, ka bawm tuah!” tiah a ti(Mk 9:23-24).

Hi thil sining hi Jesuh muihmai aa thlen hnu ah a cang mi a si i Jesuh muihmai aa thlen lio ah Peter, James le Johan hna zong an um ve. Tlang cungin an tum hnu, “a dang zultu dang hna sin kha an va phak tikah, mi tampi an rak um kha an hmuh hna. Phungbia cawnpiaktu saya a cheu khat kha a zultu hna he cun bia an rak i al le ko.” Hi konglam le sining te hi Moses le Pathian an i chawnh khawh hnu Moses cu nawlbia pahra lungtlap he Sinai tlang in a rak tum tikah Israel mi hna bia an rak i al len bantuk te khi a si. Pathian nih a thimmi miphun hna cungah zeitluk hmanh in khuaruahhar thil rak tuah hmanhsehlaw Pathian an rak hneksak lengmang bang khan a si ko. Sihmanhsehlaw, Pathian le a sal Moses cu zeitluk hmanh in do hmanh hna sehlaw an rak tei kho hna lo.

Jesuh Khrih zong nih khuaruahhar thil tampi a hmuhsak ko hna. Sihmanhsehlaw a do tu le Jesuh Khrih cungah nahchuahnak lungput a ngeitu hna nih cun an rak hneksak lengmang ve ko. An tei kho bal ve lo.

Dawtmi u le nau hna, taksa he a nungmi kan si caah kan zumhnak a der kho ve. Mipa nih “Ka zumh ko, sihmanhsehlaw a za lo, ka bawm tuah!”a ti bangin le zultu hna nih “Kan zumhnak hi nganter deuh tuah”(Lk 17:5) tiah Jesuh sinah an hal bang khan Jesuh sinah kan zumhnak a thawn khawh chin lengmang nak hnga ding caah thlacam zungzal ve hna u sih.

A pa zumhnak nih a fapa damnak a hmuhter khawh bangin, pakhat cio Pathian cung kan zumhnak nih kan pawngkam, kan rampi a damter khawh ve ko lai.