Jesuh nih a sin kan panh ding a duh

Mi tampi nih Jesuh sinah an fa le an rat pi hna tikah zultu hna nih cu hna cu an rak sik hna. Cucu Jesuh nih a hmuh tikah a thin a hung i a zultu hna cu, “Ngakchia acu ka sinah ratter ko hna u. Pathian Pennak cu hi bantuk mi hna ta hi a sic aah, annih cu kham hna hlah u. Mah hi philh hlah u. pathian Pennak kha ngakchia nih an cohlan bantukin a cohlang lomi cu, ahohmanh Pathian Pennak chungah cun an lut lai lo,” tiah a ti hna (Mark 10:14-15).

Dawtmi u le nau hna, Pathian hmai ah cun kan nih vialte hna hi ngakchia kan si dih ko hna. Nu le hna nih an fa le kha Jesuh sinah rat pi an i zuam bantukin, Pathian riantuan tu hna nih Jesuh Pathian sin kan phanh khawhnak hnga ding caah fakpi in an i zuam ve. Sihmanhsehlaw, Jesuh sin kan phanh khawh lonak hnga ding caah dawnkhaantu, Satan riantuan nak zong hi a hung um thiam ve.

Jeush Khrih sinah phanh a duh mi vialte, phanh khawh ding caah aa zuammi vialte hna kha Jesuh nih a mithmai a mer tak bal hna lo. Dawnkhaantu hna tu kha a sik a thawl hna i Amah hrimhrim nih a sin a panh mi paoh kha a rak don ko hna. “A pom hna i an cungah a kut a chuan i thluachuahnak a pek hna”(Mark 10:16). Zeicah kan ti a si ah cun Jesuh cu a mi hna he an um ah khan aa lawmh caah a si. Pathian umnak hmunhma paoh ah thluachuah a um i, thluachuah umnak hmun paoh ah daihnak a um ve, cun daihnak a umnak hmuh paoh ah lunglawmhnak a um.

Dawtmi u le nau hna, Jesuh sin ah midang kha a kal pi kho tu kan si ve cang hna maw? Asiloah, Jesuh sin an phanh khawh lonak hnga ding caah a khaamtu le dawnkhaan tu maw kan si? A khaamtu le dawnkhantu kan si sual a si ah cun Jesuh nih a kan sik sual lai. Jesuh sinah midang kha a kal pi kho tu kan si hna a si ah cun Jesuh nih a kan lawmh ko lai.

Jesuh sinah thlarau tampi a kalpi kho tu si khawh i zuam cio hna u sih.