Jesuh nih a kan duhpiak mi hi zeidah a si?

Jesuh cu khual tlawn ah aa thawh than i cu lioah cun mipa pakhat a hung thli i a hmaiah a khuk aa bil i, “Saya, nangmah cu mi tha na si. zungzal nunnak hmuh awkah zeidah ka tuah lai” tiah a hal. Jesuh nih cun, “Pakhat lawnglawng na bau, va kal law na ngiehmi thil vialte kha va zuar law tangka cu sifakmi kha va then hna, cun vancung ah rothil na ngei lai; cun ra law ka zul” tiah a ti (Mark 10:17, 21).

Nihin ni caah bupi nih a kan thimpiakmi cathiang hi “mipa pakhat nih a nunnak caah biakhiahnak zeitindah ka tuah lai” timi Jesuh sinah bia a hal nak kong a si. Sihmanhsehlaw, biakhiah awk le tuah hnga dingmi i thim ding Jesuh nih a chimh tikah mipa nih cun a cohlaang kho lo. “Cu bia cu mipa nih khan a theih tikah a hmai a chia i ngaihchia ngaiin a kir” tiah a ti (Mak 10:22). Mipa nih bia a hal mi cu bia hmaan ngai mi a si ko nain aa thimmi tu cu palhnak lam a rak si.

Jesuh nih Pathian thatnak kong a chimh hmasa hnu ah Pathian nawlbia zulh ding a herhnak kong zong a chimh ko. Cucu Pathian hmai ah aa tlak taktak mi sining le dirhmun in a um kho tak mi a si maw si lo timi kha mipa sinah a hmuhsak nak zong a si. Kannih pakhat cio hna zong a thianghlim takmi le a ttha dih cikcek mi minung ahohmanh kan um lo. Pathian hmai ah direct in phanh khawh dingin aa tlak mi ahohmanh kan um lo.

Nawlbia zulhnak le lenglei phungphai zulhnak ah cun minung sining zongin fel ngaiin kan tuah, kan thlinh khawh men ko lai. Sihmanhsehlaw, dawtnak taktak in Pathian hnu zulh kan timi ah hin “ kan hlawt hnga dingmi tete thil hna an um timi zong hi theih ding a si. Mithiang Paul nih: “Lenglei phunglam kaa bochan khawh a timi an um ahcun, cu bantuk ti khawhnak cu tam deuh chinchin ka ngei: zarh khat ka si ah cun cuarpartan ka si, chuahkehnak lei in Israel mi Benjamin phun, Hebru mithiang ka si; Judah mi Nawlbia zulhnak lei ah Farasi ka si i ka ttan tuk leiah khrihfabu kha ka hrem. Nawlbia chung thil zulh in din ti ahcun soi awk um lo ka si” tiah a ti (Filipi 3:4-6).

Jesuh nih “ra law ka zul” tiah mipa kha a ti bang khan kan nih pakhat cio hna zong Jesuh nih a kan sawm cio ve. Cucu kan caah thawngthabia taktak a si. Kan ngeihmi thil vialte chiah tak dih in Jesuh hnu zulh ding kha a si. Ngeihmi thil kan ti tikah chawva zong a si kho i ruamkainak lungthin, mah zawn lawng ruahnak lungthin zong a si kho. Jesuh nih mizapi le a zultu hna kha a auh hna i, “Zulh a ka duhmi paoh cu mah zawn aa ruat lomi nan si lai; cun nan vailamtahnak kha nan i put lai i nan ka zulh lai. zeicaahtiah a nunnak khamh a duhmi cu a nunnak kha a sung lai i keimah ruang le thawngthabia ruang i a nunnak a sungmi nih a nunnak kha a khamhlai. Mi pakhatkhat nih vawlei hi a ning piin co seh law, a nunnak sung tung seh law, zeital a miak hnga maw? Miak hlah!” tiah a ti (Mark 8:34-36).

Pathian duh mi thil aa thim kho tu le a hmu kho tu si khawh i zuam zungzal hna u sih. Hmuh thiamnak le i thim khawhnak thazang thluachuah zong hal zungzal hna u sih.