Kan Ruah Ning aa Lo Lo (Mark 10:28-31)

Jesuh nih a thawh hna i, “A inn siseh, a lo siseh, a unau si hna seh, a farle si hna seh, a nu siseh, a pa siseh, a fale si hna seh, keimah le thawngtha ruangah a kaltakmi nih cun, tam chinchin in atu chan ah hin a hmuh hrimhrim lai. Inn siseh, lo siseh unau si hna seh, far siseh, nu siseh, fa siseh; a let za khat in an hmuh lai; cun hremnak zong an hmuh lai; cun a ra dingmi chan ah hin zungzal nunnak an hmuh lai,” tiah a ti (Mark 10:29-30).

Jesuh nih a thawngthabia a cohlang kho tu si ding le a hnu zultu si khawhnak ding caah hin minung sining in intuar hnga dingmi tampi a um nak kong kha a tu le tu a kan cawnpiak. Zeicahtiah cun thatnak cu thatlonak nih a doh zungzal caah a si. Jesuh sinah ruahnak bia a haltu mirum pa nih a hmuh cia, a ngeih cia mi chawva hna hlawt tthan i Jesuh hnu zulh ding bia a theih tikah a hmai a chia i ngeihchia ngai in Jesuh kha a kal tak timi zong (Mark 10:22) ah kan hmuh. Mipa nih hin Jesuh nih pek aa timhmi laksawng sunglawi kha a hmuh khawh lo caah a si.

Mithiang Peter nih, “Cucaah nan lung in riantuan awkah timhcia tein um u. Ralring tein um u law, Jesuh Khrih a langh tikah nan hmuh laimi velngeihnak laksawng cungah khan nan i ruahchannak cu bunh ko u,” tiah a ti (1 Peter 1:13).

“Pathian nawl kha ngai u, nan rak hruh lio i nan rak ngeihmi duhnak nih khan nan ziaza cu in uk ti hna hlah seh. Nannih an kotu hna Pathian cu a thian bantukin nannih zong thiang ve u” (1Peter 1:14-15).

Jesuh hnu zulh timi cu mah caah tiin zeihmanh i chiah loin, ka Bawipa caah tiin zeizong vialte amah pek khi a si. Ready in um zungzal khi a si. Zultu hna zong nih (Mark 1:16-20) an ngeihchiah mi vialte chiah ta dih in Jesuh hnu an zulh tikah Jesuh nih hmai lei an hmuh te hnga dingmi laksawng kong (Mark 10:28-30) ah a chimh hna. Cun Jesuh nih an zumhnak a der nak hnga lo ding caah a tu le a tu ralrinnak zong a pek hna.

Jesuh hnu zultu si khawh ding caah Jesuh nih standard a chiahmi hna hi hi vawlei sining tahnak pedan in tah a si ah cun thil a si kho lomi khi an si ko. Jesuh hnu zulh ruangah chungkhar, hawikom, theih hngalh mi hna nih huat ding cu a har ngaingai mi a si ko. Sihmanhshelaw, Jesuh Khrih nih a kan cawnpiak duhmi cu “Pathian tluk in zeibantuk thil hmanh dawt lo ding” timi kha a si. Kanmah le kanmah kan i dawtnak hmanh in amah kha kan dawt deuh awk a si; a duhmi kha kan duh nak anganbik le a hmasabik ah chiah ding a si timi kha a si.

Jesuh hnu a zul mi hna paoh nih an i ruahchan mi cu “Hmai lei caan ah zungzal nunnuamhnak co ding kha a si”. Mi tampi nih cun hmai lei thil (thih hnu pin lei kong) a si te hnga dingmi hna nak in hi vawlei cung thil sining kong le nihin, thaizing caah zeitin dah kan um, kan kal lai timi kong hi a ruat mi kan tam deuh. Hmai lei kong (thih hnu pin lei sining kong) kan ruah cio a si ah cun mithiang Paul bangin kan chim kan nung kho ve ko hnga. Paul nih cun:

“Nunnak hi ka caah zeidah a si? Kei ka caah cun nunnak cu Khrih a si ko. Cucaah thihnak nih hin a tha deuh chinchinmi thil hmanh a chuahpi lai. Asinain ka nun ko rih i cu ka nun ruang i thil tha tam deuh ka tuah khawh ding a si ahcun, a zei cu dik kaa thim deuh hnga, ka hngal lo. Thil pahnih karlak ah kaa tenh: hi nunnak hi kaltak i Khrih he um cu ka duh hringhran, cucu a tha deuh suaumaumi a si,” tiah a ti (Filipi 1:21-23).

Minung hna nih tahfung ah kan hmanmi sining le Pathian nih tahfung ah a hmanmi sining hna hi aa thlei dang hringhran. Pathian cu leng lei in minung a zoh mi si loin, chunglei sining le lungthin a zoh mi a si. Biakam hlun chungah: Sihmanhsehlaw Bawipa nih Samuel sinah cun, “A muisam in siseh, a pumrua in siseh, zoh hlah; zeitintiah Bawipa nih cun mi i an zohning in a zoh lo; mi nih cun lenglei langhning kha an zoh, sihmanhsehlaw Bawipa nih cun lungthin kha a zoh” tiah a ti (1 Samuel 16:7).

Dawtmi u le nau hna Bawipa Duhnak kha a theithiam i a kawl kho tu si khawh i zuam zungzal hna u sih.