Adikmi dawtnak cu ningkel lo umnak in a luat

Ahmaan le hmaanlo hmuhkhawh lonak cu mitcaw bantuk asi. Chungkhar a ngeicang mi kha duhnak, ngeih duhnak, cu a dikmi dawtnak asilo. Duhfahtuknak men asi. Aruang cu a hmaan le hmaanlo thleidan khawhlo tiang i muihnak nih a khuhchilh caah asi. A dikmi dawtnak cu duhfah dawtnak he aa thleihdan hringhran. Mirum fapa nih misifak mi nu a thit cu duhnak mitcaw asilo. A si a fah ah siseh, a rum ah siseh, minung vialte hi aa khat dih. Man a ngeihnak a hmuhpiak caah a thitmi asi.
Duhfahnak cu thi le sa in a rami asi. A dikmi dawtnak cu thluak le thinlung in a ra an ti. Chungkhar umko buin ningkel loin umnak zong duhfahnak mitcaw duhnak asi ko.

(2Samuel 11:2-18) ah, David siangpahrang le Bathsheba tuanbia kan rel ahcun a dikmi dawtnak le duhfahnak bianabia pakhat kan thleidang khawh. David siangpahrangpa cu miding asi ko nain Bathsheba cungah palhnak pahnih a rak tuah. Nikhat ah David siangpahrang cu a ihkhun in a tho i inncung thlalang awng in khua a cuanlio ah aa dawhngai mi minu pakhat ti aa kholh lio mi nu kha a hmuh tikah a lung ah a campeng. Cu minu kong kha a hlat tikah amah cungah a dinfel mi ralbawi Uriah nupi asi kha a hngalh. Sihmanhsehlaw, va ngeimi nu asiko buin Bathsheba a laak i a vapa Uriah kha thihnak hmun ah a rak kuat.

Hi thil sining ahhin David siangpahrangpa i Bathsheba a thinlung ah a campengnak hi a dikmi dawtnak kan ti kho lai maw? Va ngeimi nupi kha laak cu sualnak asi ti a hmulo mi kha a dikmi dawtnak kan ti kho lai maw? Bathsheba laak khawhnak caah a vapa (Uriah) kha thi seh tiah khua a khan mi cu a dikmi dawtnak kan ti lai maw? Cu thil sining ah David siangpahrang a thil tuahmi cu duhfahnak ruangah asi, thil `halo tuahnak asi, tiah bible ah roca a tial. Mitcaw dawtnak asi tiah zawmtaih in a mawhphurh.

David siangpahrang hrimhrim nih misual ka si, tiah a sual aa ngaihchih. Adang zohchunhnak pakhat ka chim rih lai. American ram Crolona ramkulh, Union khuami nu Susan Smith cu va ngeimi asi i fa pahnih a ngeicang mi nu asi. Sihmanhsehlaw, mah nu nih padang (Findali) an timi pa kha a duh than. Findali nih mah nu fa pahnih kha tuanvo ka la kholo, ngakchia hna ruangah kan thit lai lo, a ti i mah nu nih cun Findali he a thenkhawh lo caah a fale pahnih kha motor cung a chuan hna i tidil pakhat chungah thi lakin a thlak hna. 1996 kum July 23 ni ah biaceihzung nih a sual tiah sual an phawt i ngakchia pahnih thahnak ruangah thih hlanlo thong an thlak tiah mekazin pakhat ah ka rak rel.

Dawtmi caah sualnak ngeilo a chungchuak ngakchia pahnih kha a thahmi cu dawtnak kan ti kho lai maw? Ahmaan le hmaanlo, achia le atha hmanh a thleidan khawh lonak cu a dikmi dawtnak asilo. Duhfahnak lawnglawng asi. Chungkhar ah dinfel lonak kha duhdawtnak asi, kan ti lai maw?

Dawtnak taktak a ngeimi cu chungkhar dinfelnak kha a hngalh. A kilveng. Duhfahnak tu cu dawtnak taktak asilo. Mitcaw dawtnak menmen asi. Mitcaw dawtnak cu palhnak tampi a tuahter theo.

Duhfahnak bianabia pakhat cu David siangpahrang i a fapa hrut (Amnon) sining kha langhter ka duh. Amnon cu Tamar an timi nute thit a duh ruangah rawlei khawh lo tiangin a rak ing. Tamar nih a duh nalo in a rak ihpi hnu ahcun khahlan i kan dawttuk tiah a rak ti tawnmi nak khan tampi in a rak huat than (Cf. 2Samuel 1:16). Duhfahnak cu caansau a nguhlo. Zeicahtiah dawtnak taktak asilo caah asi. Cucaah dawtnak dik le mitcaw dawtnak kha thleidan thiam lawngah minung cu huham an serkhawh lai i ningkello a palh tawnmi duhfahnak lungthin kha a ukkhawh a kilven khawhlo. Chungkhar ngeiciami hna zong nih mitcaw dawtnak phun kha hrial awk asi. Duhfahnak cu ningkel loin umnak hrampi asi kan ti khawh.

Mobile App Radio Veritas Asia (RVA)

PlayStore: https://bit.ly/3lg9uIQ

AppStore: https://apple.co/3jakDbi