DAWTNAK I A RALCHANHMI THIL

“Dawtnak i a ralchanhmi biafang cu zeidah a si kha”
Biahaltu kha a mitsir in a hei zoh
A si ko hen cu
Mah thamtham cu... ngakchia thawkin pei theih cio a si ko cu.
“Nang na ruah bang huat... huatnak cu a silo kha mu... A ngaite tiah cun
Dawtnak i ralchanhmi biafang cu
Nahchuahnak pei si cu... na hngalh maw?”
Khua ruat ciammam in a rak chimmi
A hawipa pakhat i bia
Amah zong chitkhat tluk kauh chap in khua a ruat ve
Zohmanh!...
Adam le Eve hna nih Pathian kha an huat caah Sualnak an rak tuahmi asilo hen cu
Annih Pathian bantuk si duhnak
Pathian bantuk thawnnak huham ngeih duhnak
Annih an chung thinlungin nahchuahnak ruangah pei..
Nunnak ah
Tlamtling lo si cionak
Fakpi in soisel zuamhnawh doh cionak
A dinglo in hleng hmannak
Tiah buaibainak phuntling a hrampi cu...
Nahchuahnak a si tiah fiangtein ti khawh silo hmanhsehlaw Phundang in cun aa tel i aa pehtlaih ve ko hen cu...
Mi pakhatkhat tu nih
Mah (pumpak) nakin a thiam deuh,
A fim deuh cang ahcun,
Asiloah tlawmpalte
A kan tei (lonh) deuh cang hmanh ah khin
100% zeitikhmanh ah
cohlan lunghmuih pinak a ngeih piak lomi minung kokek sining.
Khi nahchuahnak ruangah pei si cu.
Thinlung put hna aa thleidan (thenthek) cio
Chawnh khawh lo, i chimh khawhlo an si cio Harnak phanh dingin Kapkhat le kapkhat pehtlai tein Rap hna i chiah piak,
Fakpi in soisel sawh kalh zuanhnawh doh cionak he Fakpi in tihnung tukmi
Khi nahchuahnak thinlung
Khi nahchuahnak lungthin nih... Lungchung ruahnak a thiannak kha Muici a nehter.
Nunnak i lungnuamhnak kha a hrawh a lohtlauter.
A hnubik ah minung thanchonak (huham) zong kha a chiatter.
Khi nahchuahnak thiamthiam nih pei thilaunternak zongah
Khulnuar lo rianrang in hmunkhat ah a chuahter thiam rih.
Cucaah cun pei
Minung tuanbia ah hmasabik lainawnnak cu Nahchuahnak ruangah a rak si.
Cain le Abel (Genesis 4:1-15)
“Mikip cungah
Aa lawh lomi veel thluachuah pakhat cio kha
Pathian nih a pek” timi kha
Midang cungah
thanchonak caah lawmhpi ding, kan i harh cionak sining.
Cucaah... ralring tein um, theih hngalhnak in uk i Pumpak kha remh chunh in kan thlen hna lai.
Khi nahchuahnak thinlung kha
Tha tein kan uk khawh hlan lo
A nau chuahpi Abel kha a rak thatmi Cain bantuk phun in Nunnak ah lunretheihnak lawng in a khat i
Zalongte lunglawmh tein um thutnak a tuah kho lomi Minung kan si lai ti cu a hmaanmi a si.
Cuti a si ahcun...
“Dawtnak” i aa ralchanh mi biafang cu “Huatnak” siloin
“Nahchuahnak” hna pei an va si ko hen cu tiah Ruat in ka tuaktan bak ko.