Hruaitu Tha Nun

“Mah le mah aa ngantermi cu thumh an si lai I mi toiah aa dormi cu mi ngan ah ser an si lai.” (Matthai 23:12)

Ordination hmuh lio caah ah Bishop nih Siangbawi te kha Bible cauk a pek hna i ralrinnak bia a chimhmi hna cu, “Na relmi Bible kha zum! Na zumh mi kha phuang law na phuan mi kha zul!” tiin a ti tawn hna. Kan chim phuan mi kha kanmah hrimhrim nih kan tuah, kan zulh lawngah kan chimmi thawngthabia a ngaitu hna zong nih kan chimmi cungah zumhnak an ngei kho ve lai.
Midang hmai hmuhnak ah aparpavuan zoh dawh menmen in um ding a si lo. Chimphuanmi le tuahser mi aa lawh lo a si ahcun caan sau a rauh hlaan ah midang congawihnak menmen lawng a hung chuak ko lai. Farasi mi hna hi mi hmai ah aa titer mi an rak si caah Jesuh Khrih nih a rak mawhchiat hna nak hi a rak si. Zeizong te a thei dih mi a thiam dih mi bangin aa rak um ter mi an rak si.

Hruaitu a simi si hna seh, nawl ngeitu si hna seh, thutdan ca lawngah an i zuam a si ah cun zeitin dah mipi caah rian cu an tuan khawh lai i mipi sinin zumhnak le bochannak an hmuh khawh lai? Hruaitu tha taktak a simi hna cu a chim lawng chim loin anmah hrimhrim nih an chimrel mi kha an zulh an tuah.

Pathian cu kan hruaitu tha taktak a si, kan saya taktak a si i kan Pa taktak a si. Jesuh Khrih hrimhrim nih hi bantuk nunzia in lam a rak kan hmuh sak cang. Kan nih Khrihfa mi hna zong, Jesuh Khrih nih lam a kan hmuhsak mi kha zulh in nun ding a si.