NUPI THA HNA MAN

Ecclesiates (Phungchimtu) ah, a chim micu nupu tha hna an man kha a tanglei bangin a thangthat.

“Lungtlinter zaangfahnak a ngeimi nupi cu zaangfahnak (iang) a dotdot he a tlingmi an si. Nupa sualduhnak he a thiangmi thlarau cu, man khiahkhawh asilo. Pathian hmunthiang hna kha, ni a chuah tikah nichawn a tlan bantukin nun ziaza huham he a khatmi nu hna i duhnung an sinak cu biaktheng i pekchanhmi meitung in ceunak bantuk an si.

Ziaza tha a ngeimi nupi hna thinlung ah Pathian nawlbia hna a hmunnak cu zungzal a hmunmi a hran hna kha lungpi cungah thihri bunhmi bantuk asi (Phungch. 26. 16-24).

Ziaza dinnak he a tlingmi nu cu man khiahkhawh asilo. “Nupi tha cu hlawn nakin tampi a sungdeuh, cubantuk mi hmuh bel cu a har hringhran. A va nih aa bochan i a va cu asi a fak bal lailo. A nupi nihcun a nunchung vialte a va caah khan chiatnak siloin thatnak kha a tuah. Tuuhmul le khumla in puan kha a tah lengmang hna (Phungthluk. 31:10- 13). Nupi `ha hna thawngin va le nunnak ah daihnak an hmuh. An i nuam asi.

“Nupi tha i a vapa cu a lung aa nuam. Lethnih in an chan a sau. A nun ziaza a thami nupi cu a vapa lung a lawmhter i a nunchung vialte a lungthin a daih ter. Nupi tha cu a thami tlawmhchaw (dawtnak in pekthenhmi chawva-minkala lehphoih) an si. Pathian a tihmi hna cu a thami thil kha a tuah caah a pekmi laksawng chungah aa telve. Cu a vapa cu a thinlung thatnak nih a sifah, a rum thleidan loin zeitik caan paoh ah merh in a lung aa lawmh zungzal (Phungch. 26:1-4). Nunnem mi nupi, zaangfah awk a thlum bia a chim thiammi nupi, in tuarh in ngaihthiam khawhnak a ngeimi nupi hna cu an vale kha a thatnak nak leiah an thlengter khawh hna.

“Cu nupi ah zaangfah lungdaihnak a pemi bia chimthiamnak sining a ngei i daihter remhternak le zaangfah zawnruahnak thinlung a ngeih ahcun a vapa cu midang vale hna he aa lo mi asi hrimhrim lai lo. Cubantuk nupi a ngeimi pa cu mansung thilri, tangka ngeih bantuk asi (Phungch. 36:25-26). Clovis (king of the Franks) nih Clotilde an timi nupi pakhat a rak ngeih. Cu siangpahrang nupi cu khrihfa asi i Pathian a zumh ngaingai mi asi. Siangpahrangpa kha a upat a dawttuk hringhran i a nawlngaihnak in a khatmi nu asi. Zaangfahnak in a khat. A dinfel. A hramthawk ah siangpahrangpa cu khrihfa a rak silo. Siangpahrang nupi cu nupi tha pakhat a rak si i, zohchunhawk tha thil a rak langhter lengmang. Amah nih siangpahrang cungah a chiahmi nawlngaihnak, a dawtnak kha mipa pakhat nih a khuaruah a har kha a hmuh tikah mah nu nih “Keimah cu siangpahrangpa kha ka duh caah keimah duhnak tein ka nu le ka pa inn kha a rak kaltak mi nu ka si. Atu ka umnak inn hi ka vapa inn asi. Amah nawl ka ngaihawk asi, ka dawtawk asi, tiah a leh zungzal theo. Mah nu i a thami zohchunhawk a tuahmi ruangah Clovis siangpahrangpa cu khrihfa ah a rak lut.

Clotilde siangpahrangnu cu Clovis siangpahrangpa caah man khiah khawhlo mi mansung lungvar pakhat a rak si. Cucaah chungkhar kongah chungkhar ngeicia hna i Pathian upatnak, tuanvo tlinhnak, zohchunh awk tha an langhternak hna cu chungkhar kongkau ah teinak hmuhnak caah abikin bawmtu asi timi cu lungawtawm awk a umlo. Nupi hna nih dinfelnak thilthuam kha tlaihchanh duhnung tein an i hruknak thawngin chungkhar ah huham iang a karhter.

Mithiang Peter nih, “Lenglei i tamhnak, nan sam phiarning tehna, nan thi nan hlawn tehna, nan thil nan thuam tehna ahkhan, nan i dawhnak cu a um awk asilo, nan i dawhnak cu nan chung muru ah a umawk tu asi i cu nan i dawhnak cu a tarkho lomi nemnak le daihnak lungthin, Pathian mithmuh i a sungbik mi thil asimi kha asi. Pathian a rak i bochan mi nu hna cu, cu bantukin an i dawhnak asimi cu asi.. an vale nawl an ngaihnak ahkhan an i dawhnak cu asi. Sarah kha cubantuk cu asi, Abraham kha a nawl a ngaih i, ‘Ka bawipa’ tiah a auh. Thatnak nan tuah i zeihmanh tihnak nan ngeihlo ahcun, a fanule cu nanmah hi nan si” tiah a ti (1Pt. 3:3-7). Sihmanhsehlaw nu thalo hna cu tihnung an si tiah Phungchimtu nih a ti. “Nu thalo hna he umti mi nakin chiandeih siloah limkeng he umtinak nih thinlung a daideuh (Phungch. 25:23).

Daitein a umthiam lomi caw tuahkhat bantukin nu thalo cu an si. Amah a hmuhtu pa cu sakhi that mei aa tlaih sualmi bantuk asi (Phungch. 26:10). Nupi tha hna thawngin innchungkhar hna ah thatnak an ton.

Khrihfa nu hna cu a thami nu an si i a nunnak kha an remh zungzal caah thangthat awk tlak an si ahcun thluachuak mi nunning ziaza kha an sermi asi. Chungkhar tuanvo rian tlam a tlinhmi, dinfelmi pa an um bantukin nupi tha tampi zong an umve. An i pekchanhnak, an intuarhnak, pum i peknak le dawtnak hna kha Catholic Bupi nih a thang`hat zungzal lai.