Bawinu Mary Lungthin Thiang sin Pekchanh Thlacamnak

Pathian i nu le kan nu a si mi maw Bawinu Mary, harsatnak kan ton lio caan ah hin na sin ah kan rak in panh cio ko. Kan nu na si bangin na kan theih, na kan dawt i kan lungthin chungin kan duh herh mi vialte hna cu na sin in kan thup kho bal lo. Zangfah thiam mi Bawinu, na daihnak he na kan umpinak le na kan zohkhenhnak hi na fale hna nih kan ton zungzal ko cang. Nangmah cu Daihnak Siangpahrang a si mi Jesuh sinah a kan hruai zungzaltu na si.

Sihmanhsehlaw daihnak lam in kan pial sual cang. Vawlei pumpi huap voi(2) tiang ral thawh ruangah mi thong tampi thihnak ral kan rak tonmi ngaihchiatnak hna zong kha kan philh sual cang. Miphun khat ramkhat kan si tiin biakamnak kan rak tuah mi hna zong kan philh sual cang. Minung hna i daihnak chunmang hna le mino hna ruahchannak hna zong lei kan rawi sual cang. Mah duhnak lawngin kan nung, mah ram ca lawngah khua kan ruat i midang hna caah i theihter duh loin kan um sual cang. Pathian hlawt in thil a hmun lomi cungah kan hna ngam. Ruamkai nak lungthin he puar ngai in thazaang dermi hna kha kan namchih hna i kan hriamnam hna lawng kan i khawn hna. Kan vawlei pi cungah siseh kan innpa hna cungah siseh bawmchantu le zohkhenhtu sinak kha kan tlolh cang. Kan vawlei pi cu raltuknak le sualnak in kan hrawh cang i unau `afar sinning nunzia in nun dingah a kan duh piaktu Vancung um Kan Pa lungthin kha kan khuai cang. Mah zawn lawng ruah in thil dangdang hna le mi dang hna cungah i theihter duh lo nak lungthin in kan nung cang. Atu cu ngaihchia lungkuai in na sinah kan rak in fuh ko, Bawipa, kan sualnak kan ngaithiam ko sawh.

A thianghlim mi kan Nu, kan sualnak chungah siseh, harsatnak le zangdernak, `ihnung ral kan tonnak chungin Pathian nih zeitikhmanh ah hlaw loin zangfah dawtnak he kan sualnak ngaihthiam dingin le nunzia thar in kan nun khawh `hannak hnga ding caah a kan zungzal nak kong ralrin nak na rak kan pek. Pathian nih nang cu a rak kan pek mi na si bangin na lungthin thiang cu Bupi caah le na fale hna kan i dornak si ding caah pekmi na si. Pathian zangfahnak thawngin minung hna kan tuanbia a harbik caan lio zongah Bawinu, nangmah nih na dawtnak he na kan hruai i na rak kan um pi zungzal tawn.

Atu cu nangmah lei ah hoih in na lungthin innka kan rak kingh cio ko cang. Kannih hna cu na dawtmi na fale hna kan si. Caan khat hnu caan khat pehzulh in langhnak le i phuannak na tuah tawn i kan sualnak in kan i ngaihchih `hannak hnga ding caah na kan auh zungzal. Hi bantuk muihnak caan kan ton lio caan zongah run kan bawm hram ko law run kan hnem ko sawh. “Nan Nu hi ka ah hin ka um lo maw?” tiin voi (1) in run kan chim `han ko sawh. Kan chan i kan tonmi hna le kan lungthin chungum `em`awntu `halo hna chung khan nangmah nih run kan phoih piak hram ko sawh. Abikin a tu bantuk harsatnak kan ton lio caan ah nangmah sin bawmnak kan in hal mi hna hi theih piak lo in na kan um piak hrimhrim lai lo timi zumhnak kan ngei.

Cucu Galilee peng Cana khua qhitumhnak puai ah Jesuh sin na rak hal bang khan a si i Jesuh nih avoi (1) nak bik khuaruahharnak thil a rak tuah. ~hitumhnak puai i an lunglawmhnak pehzulh khawhnak ding caah na rak chimh mi cu, “Mitsur hang an ngei ti lo” tiah na rak ti. Maw kan Nu, na rak chimmi bia hna le thlacamnak hna kha atu kannih hna ca zongah run kan chim piak ve ko sawh. Kan i ruahchannak mitsurhang zong a dih ve cang, lunglawmhnak hna zong an tlau i Unau kan sinak hna zong an lo cang hna. Minung kan sinak mansung zong kan philh i daihnak hna zong kan thlau cang hna. Rawhralnak le zaang ennak lei lawngah kan lungthin hna hi kan kal ter cang. Maw kan Nu, nangmah bawmhnak kan herh hringhran ko.

Maw kan Nu - kan thlacamnak run kan theih piak ko sawh.

Rili Arfi - raltuknak tilet a thawh tikah rawhralnak ah run kan phanhter sawh hlah.

Biakam kuangthar a simi - remnak lam le daihnak lam kan hmuhsak ko sawh.

Vancung Siangpahrang nu - Pathian daihnak kha hi vawlei cungah runtlunter ko sawh.

Huatnak le lehrulh duhnak lungthin hna kha tlauter hna law i ngaihthiamnak kha kan cawnpiak ko sawh.

Raltuknak in kan luatter law kan vawlei pi kha nuclear hriam hmannak in run khamh ko sawh.

Rosary Siangpahrang Nu - dawtnak lungthin le thlacam kan herh zia hi run kan theihter ko sawh.

Chungkhar hna i Siangpahrang Nu - mi vialte sinah dawtnak lam hmuhsak ko hna.

Daihnak Siangpahrang Nu - kan vawlei pi caah daihnak kan lak piak ko sawh.

Maw kan Nu, ngaihchiat lungkuai in thlacamnak nih a hakmi lungthin hna kha rak nemter ko seh. Kan caah a tla mi na mitthli hna nih huatnak in a rocar cang mi kan vawlei pi kha a tharmi daihnak in run par ter qhan ko seh. ~ihnung hriamnam khuari kar lak ah na thlacampiak nak nih daihnak lei ah khua kan ruahter qhan ko seh. Bomh puah nak hna chungin harsatnak a tong mi hna zong, an Nu na si nak nih hnemhnak pe hram ko hna seh. Khua le ram, inn le lo a kal tak cang mi hna zong nih an Nu na sinak i na zohkhenh hna nak tangah um kho cio ko hna seh. Harsat fahnak a tong mi kan unau hna cungah zangfah thiamnak lungthin kan ngeihter law cohlaan thiamnak lungthin kan pe ko sawh.

Athiang Pathian i Nu, vailam pawng zultu pakhat he nan dir lio caan ah Jesuh nih, “Na fa kha zoh” tiah an rak ti. Cubantukin kan nih pakhat cio hna zong nangmah zohkhenh nak tangah pekchanh mi kan si. Zultu hna le kannih pakhat cio hna zong Jesuh nih a kan fial mi cu, “Na nu kha zoh” timi a si. Kan Nu Mary, kan nunnak ah siseh, kan tuanbia ah siseh nangmah sawm kan in duh cio ko. A tu caan ah lung rethei khuaruahhar vansang in a ummi kannih vialte zong Jesuh vailam pawngah nangmah he kan dir ve ko. Kan herh mi hna kha na Fapa sinah kan pekchanh piak ve ko sawh. Ukraine le Russia ram in nangmah cungah bochannak lungthin a ngei mi hna zong nih nangmah lei hoih in an rak in panh cio ko. Raltuk ruangah siseh, paw`am in a ummi si hna seh, ningcang loin tuahser nak a tongmi hna le sifah ruangah an nunnak a liam mi hna zong zangfah thiammi Bawinu, nangmah nih run zohkhenh ko hna.

Pathian i Nu le kan Nu a si mi Bawinu na lungthin thiang sinah kan Bupi le minung vialte, abikin Ukraine le Russia ram hna caah pekchanhnak kan rak tuah. Zumhnak le dawtnak he kan in pekchanhnak hi rak cohlang ko sawh. Raltuk nak vialte dai dih cang sehlaw vawlei cung ram kip ah daihnak leng cang ko seh. “Na bia bang in si ko seh” tiin Bawinu lungthin chungin a rak chuak mi bia nih daihnak Siangpahrang sinah tuanbia thar qial cang ko seh. Bawinu lungthin thiang in daihnak thar a hung chuak qhan lai timi zumhnak kan ngei. Mi vialte hna i hmailei caan sining, minung pakhat cio i kan herh mi hna le vawlei cung um mi vialte hna i ruahchannak le lung retheih nak vialte hna cu Bawinu, nangmah sinah kan rak ap ko.

Maw Bawinu, nangmah thlacam piaknak thawngin hi vawlei pi nih Pathian zangfahnak cohlang ko sehlaw kan chan chungah hin daihnak hla dawh leng qhan ko cang seh. “Na bia bangin si ko seh” tiin chimphuan thiamnak ceunak an petu Thiang Thlarau Pathian nih pakhat cio kan cungah kan umpi hram sehlaw thluachuah kan pe ko seh. “A nung mi ruahchannak tiput,” a simi Bawinu Mary, a rocar mi kan lungthin hna kha ciarter qhan cang ko hna. Bawhte Jesuh nih na chungin thi-sa cannak aa rak lak bangin kan nih pakhat le pakhat karlak ah pumkhat, lungthin khat sinak in run kan qhan ter ve ko sawh. Hlaan lio hi vawlei cung i a rak um mi na si bangin, a tu na fale kan nih vialte hna zong daihnak lam ah kan hruai ko sawh. Amen