Na tuh bangin na zun lai

Thih hnu ah thlaan chungin thawhter than a si mi Lazarus, khuaruahhar thil a phunphun a tuah i khamhnak thawngthabia a phungtu Jesuh, Bethany khua Martha le Mary te in a phanh lio an i ton lio ah hin hmuh a duh tu minung zeitluk in dah an rak tam hnga? Jesuh hmuh an duh mi hi Pathian an dawt tak ruangah maw a si hnga, khuaruahhar thil a tuah hnga maw tiin hmuh an duh ruangah maw a si hnga?

Jesuh nih cun a zei ti bantuk phungsan in kan kawl zongah siseh, hmuh kan duh zongah siseh sual a kan phaw lo, a kan dawt zungzal ko.

Pa Pathian nawl ngai in mi vialte sual sal tannak chungin khamh awkah Calvary tlangpar raithawinak hmun a phanh hlaan deuh ah hin tukforhnak a tam chinchin in a rak ton khah.

Mary nih a man a sung ngaingaimi zihmui phun tha ngaimi kha a rak i put i Jesuh ke ah khan a toih i a sam in a hnawh hna tikah inn cu zihmui rim thaw cun a khat dih. Mary nih hi thil a tuah mi kha fir a hmang mi Judas Iscariot nih a hmuh tikah, “Hi zihmui hi ziah tangka 300 ah zuar in misifak kha an pek deuh hna lo?” tiah a ti. Hi bantukin bia a chim cu misifak kha an zawn a ruah hna caah si loin, mifir rak si kaw a kenmi tangka bawm chung khan a rak i lak lengmang tawn ca tu ah a rak si.

Pathian Fapa Jesuh nih an tuahser nak hna le an ruahnak vialte cu a theih dih ko. Sihmanhsehlaw sual a phaw hna lo. A caan a zat tik tu ah an tuahser ning cio in pek than an si lai caah a si. Dawtmi u le nau hna, midang hna nih thil tha kan tuahnak cungah a kan thangthat ding hi kan i ruah lengmang ding a si lo. A caan a zat ahcun kan tuahser ning cio in Pathian nih a kan pek te ko lai.

Thatnak tam deuh kan tuah caan paoh ah tukforhtu tam chinchin in an ra thiam. Pathian Fapa Jesuh Khrih hrimhrim hmanh kha an rak tukforh peng ko kha tah. Thil tha na tuah mi cu pehzulh in tuah lengmang ko.