Sual ngaihchihnak lungthin Pathian nih a cohlaan

Kan Bible thiang chungah kan Bawipa Jesuh Khrih a rak rawi tu pahnih kan hmuh khawh hna. Tu caan cu a thiang zarh chung kan um lio caan a si bangin Bupi nih a kan thimpiakmi cathiang hna zong hi Jesuh temhinnak a tuar lai nak kong lawng te an si. Cun rawitu Judas Iscariot kong zong tampi a kan ruah ter.

Nihin ni caah Bupi nih a kan thimpiakmi cathiang (Matthai 26:14-25) a si i rawitu Judas nih zeitin dah a rawi lai nak kong aa timh ning a si timi a langhter. Judas Iscariot nih Jesuh a rawi tikah timhnak tha tein a tuah hnu ah a rawi. Jesuh a huatu hna le a ngiar lengmang tu hna he ngun tangka 30 in an kut ah chanh dingin biakamnak a tuah.

Mithiang Peter zong nih kan Bawipa Jesuh Khrih a rak rawi bal ve. Voi-3 tiang ka thei lo (Matt 26:34; Jn 18:17,25,27) tiah a rak ti. Sihmanhsehlaw Peter nih cun Jesuh Khrih hi zeitindah ka rawi lai timi timhtuahnak zeihmanh a rak ngei lo. Peter cu mi lung rang pakhat a si bangin Jesuh nih bia a hal tik hna zongah a lung chungin a hung chuakmi paoh kha chim a hmang mi a si. Minung sining in thazaang dernak he a khat mi pakhat a rak si. Sihmanhsehlaw ngaihchihnak lungthin he Pathian sinah a hung kir than ko leng mang mi zong a rak si.

Jesuh cu Pathian a si. Pathian nih cun zeizong vialte a theih, a hngalh khawh dih. Peter konglam siseh, Judas Iscariot konglam siseh a hngal dih tu a si. Thazaang a dermi minung hi Pathian nih a kan dawt zungzal ko. Cu ruangah cun pei Pathian nih minung vialte khamh kan si khawh nak hnga ding caah a Fapa dawt kha kan sinah a rak thlahnak a si cu. Peter cu ngaihchihnak lungthin he Pathian sinah a kir than kho zungzal tu a si. Peter cu zeitluk hmanh in thazaang dernak he khat ko hmanh sehlaw ngaihchihnak thinlung he Pathian sin a kir khawh than zungzal caah Pathian nih a Bupi hruaitu si awkah a rak thim. Ngaihchihnak lungthin a ngei lomi Judas kong he pehtlai in Jesuh nih, “MiFapa a rawitu caah cun ngaihchia a si ko. Cu pa cu chuak loin rak um seh law a caah a tha deuh hnga” tiah a ti (Matt 26:24).

Kan nih pakhat cio zong thazaang dernak he a khat mi kan si ve ko hna. Ngaihchihnak thinlung he Pathian sin kan panh than, kan kir than a si ah cun Pathian nih a kan cohlaan zungzal ko lai. Psalm catialtu pa nih, “Ka raithawinak cu toidornak lungthin hi a si, maw Pathian, toidornak lungthin le nawl ngaimi lungthin hi na hlaw lai lo,” tiah a ti (Psalm 51:17).