Thla nan cam tik, rawl nan ul tik le nan pekchanh tikah midang theihter hna hlah u (Matt 6:17-18).

Gospel thwngttha chungah kan rel kan theihmi, “Thlacam nak kong”(Matt 6:1-6, 16-18) mah kong te hi van ruât ta ana u sih. Mah catching chungah Bawipa sin thla kan cam tikah kan si ding a herh hrimhrim mi le kan tuah ding a herh hrimhrim mi hna kha a langhter. Bawipa nih a kan timi cu: “Thla nan cam tikah midepde pawl tuah bantukin nan tuahmi va langhter hlah u. Annih nih cun, mi nih kan thangtthat hna seh, tiin an tuah. Hihi philh hlah u! An tuah man cu tling tein pei an hmuh cang cu! Sihmanhsehlaw nannih nih cun mi an herhmi thil nan tthenh hna tikah, nan hawikom ttha bik hmanh nih thei hlah seh, ti in va tuah u; nanmah lawngte nih va hngal ko u. A thli tein nan tuahmi a hmutu nan Pa nih khan laksawng an pek hna lai.”

Zeiruangah dah Jesuh nih thlacam, rawl ul le pekchanhnak kong hi a bik in a chim hnga? Zeicah kan ti a si ah cun Judah miphun hna nih hi pathum hna hi biaknak lei konglam he pehtlai in a bik in an chiah mi an si caah a si. Cu pin ah biaknak lei ah aa zuam mi hna nih an tuah mi a si caah a si fawn.

Bawipa nih zeiruang ah dah a bik in a langhter ve hna hnga? “Zeiraung ah dah thla kan cam, rawl kan ul hna i pekchanhnak kan tuah cio hna timi zong hi ruah ngai ding mi thil pakhat a si tthan ve.” Kan tuah ser mi hna kha mi nih kan hmu hna seh tiin maw? A si lo ah Pathian sunpar lian ngannak langhter duh ah maw a si?

Bawipa nih a hnu zultu hna mah le mah i cawisan nak thinlung ngeih lo ding in a cawnpiak zungzal hna. Biatak biaknak lei zuamnak timi cu lenglei thianhhlim bantuk bang si lo in thukpi in sullam a ngei mi a si. Biaknak lei zuam timi cu: Pathian kha dawtnak thinlung he biak in thangthat kha a si. Cu cu Thiang Thlarau Pathian sin hmuh mi vel thluachuah a si i kan nunnak dihlak in Pathian sin pekchanh le a duhnak tauh kha an si. (Isaiah 11:2) chungah kan hmuh mi cu: “ Bawipa a duhnak kha zeidah a si ti a hngalh lai i Bawipa cu a ttih lai” tiah a ti bangin a si.

Bawipa nih a zultu hna sinah theihter a duh mi cu: “Pa Pathian he pum khat sinak cun kan mah hna zong Jesuh Khrih he pumkhat sinak kha a si(Jn 14:23, 15:1; 9).” Bawipa sinah dawtnak na ngeih mi tthanter chinchin na duh maw? Na inn pa hna cungah tah dawtnak thinlung ngeih chinchin khawh na duh maw? Ruahchannak ttha he Bawipa sinah thlacam hna u sih; sumnak thinlung he a herh bau mi hna kha bawmhchanh duhnak thinlung ngei zungzal hna u sih. “A thli tein nan tuahmi a hmutu nan Pa nih laksawng an pek hna lai”(Matt 6:18).