Zumhnak

Minung nih theih hngalh khawhnak a ngeih mi hi tlawm te lawng a si. Ri khiah mi chung te lawng in theih hngalhnak a ngeih khawh ti khawh zong a si. Hngalhnak phun 5 lawng a cohlang mi hna zong tampi an um. Thil dang cheukhat hna cu “senses” timi lawngin hngalh khawh lomi hna zong an um fawn. Zeibantuk thil hna cung paoh ah tongh, hmuh, rimtheih, hna in theih, tehkhawh mi 5 senses hna lawng ka cohlan hna lai kan ti a si ah cun kan theih hngalh mi hi a tlawm tuk rih ti nak a si.

Zumhnak kan timi ah hin cun minung thluak nih a theih khawh lomi pinlei thil hna kong an si. Pathian kan biak, kan zumhnak hna hi “5 senses” in kan theih ruangah kan biakmi a si lo. Vawlei cung thil sining hna cungah senses in langhter, hngalh khawh mi an si hna nain, a thianghlimmi Pathian konglam he pehtlai in cun zumhnak lawngin cohlaan khawh le hngalh khawh a si. Minung thluak nih a tei, a hngal kho dih lo.

Kan Bawipa Jesuh Khrih nih vancung Pennak kong he pehtlai in a rak cawnpiak hna lio ah biaknak lei phunghruaitu tampi hna nih an rak cohlaang kho taktak lo. Jesuh Khrih thihnak tiang in khua an rak khaan i an rak nawn.

Nang le kei nih teh, Jesuh Khrih nih Bible cathiang chungin a kan cawnpiak mi hna cungah zumhnak kan ngei kho taktak cang ve maw? A dawt nak he nifatin a kan um pi ko (Matt 28:20) timi cungah teh zumhnak na ngei kho taktak cang ve maw?

Thihnak in a tho than mi Jesuh Khrih Pathian cungah a fekmi zumhnak kan ngeih khawh nak hnga thluachuah veel hal zungzal ding a si.