Ceunak

“Hi vawlei cungah ceunak bantukin ka ratnak cu a ka zummi paoh kha khua mui chungah an um peng nakhnga lo caah a si.” (Jn 12:46)

Jesuh Khrih cu kan vawlei cungah ceunak bantukin a rak ra mi a si tiin nihin kan relmi cathiang chungah kan hmuh. Chun Ni ceu caan ah minung hna nih nunnak caah an tuan an kawl cio ko nain ceunak nih thatnak a pek hna nak cungah theihthiamnak le lawmhnak a ngei lomi hna zong an um kho men lai. Mi tampi cu zan a hun phak tik lawngah ceunak man an theih deuh i ceunak a um nak hnga ding caah mei van in ceunak kawl cio a si tawn.

Fa le hna nih a nung lio mi nu le pa hna sinin dawtnak tling tein hmuh lio caan ah nu le pa hna i an kan dawtnak a sunlawih ning kha a theithiam mi kan tlawm kho men lai. Sihmahsehlaw a kan dawtu hna an hun um lo tikah an rak kan dawtnak kong kha hnu lei khirh than a duh mi tampi zong an um.

Nangmah caah an nunnak pek tiangin an dawtu hna le an kilkawi tu hna kha na nunnak caah ceunak an petu hna an si. A rak kan dawtu hna sinin kan rak hmuh mi dawtnak ceunak hna kha kan nunnak ah langhter ve in kan vawlei pi caah, kan pawngkam a ummi hna caah ceunak si ve ding a si. Cutin kan nun khawh a si ahcun kan pawngkam caah a nuam deuh mi sining kan ser khawh ko hna lai. Cucu Jesuh Khrih nih a kan duhpiak mi zong a si.

Jesuh Khrih nih a kan pekmi, a kan hmuhsak mi dawtnak ceunak kha kan nunnak ah langhter ding a si.