Nan thin phang hlah u (Jn 14:27)

“Daihnak kan chiahtak hna, keimah daihnak cu kan pek hna. Vawlei nih an pek hna bantukin kan pe hna lo. Lungrethei le vansang um in um hlah u: nan thin zong phang hlah u.” (Jn 14:27)

Jesuh nih, “Daihnak kan chiahtak hna,” tiah a kan ti. Cu daihnak cu dawtnak in a hung chuakmi daihnak a si. Dawtnak a umnak hmun ah daihnak a um. Daihnak a umnak hmun ah rualremnak a um i teinak a um. Bawipa nih hitin a kan timi cu Amah hrimhrim nih thenthek tu le hrawktu a simi Satan kha a tei cang caah a si.

Hlaan Khrihfa mi hna nih harsatnak phuntling an rak ton lio caan ah Jesuh bia cungah zumhfek tein an rak nung kho hna. Anmah hna kha thah dingin khua a khang tu hna ca hmanh ah khan thla an rak cam piak khawh hna i an rak ngaihthiam khawh hna. Nihin kan peng kan ram ah harsatnak a phunphun in fahnak a ing mi hna tampi hmun kip ah an um cio hna. Bawipa nih daihnak kan chiahtak hna tiah a timi cungah hin zumhfeh tein kan um kho cio hna maw? Kan i ruahchan mi cungah hin teh fek tein kan dir kho cio hna maw?

Paul le Barnabas cu phung an rak chim lio caan ah hremnak tampi an rak ing. Sihmanhsehlaw Bawipa thlarau nih a rak um pi hna caah teinak an rak hmu zungzal ko. Thi lo nung lo tiang in lungchehnak zong an rak ing ko. Sihmanhsehlaw Bawipa thawngthabia an rak phuan nak ah cu harsatnak hna nih khan mission rian an rak tuan mi cungah a rak dawnkhan kho hna lo. Thlarau tampi a rak tlai kho tu an rak si (Lamkaltu 14).

Dawtmi u le nau hna pakhat le pakhat caah thlacam i bawm zungzal hna u sih. Kan i dawtnak kha kan nunnak ah langhter hna u sih. Bawipa nih a kan pek mi daihnak cu kan sinah a um zungzal ko lai.