Tih hlah u! Vawlei cu ka tei cang.

“Vawlei nih hin harnak an pek hna lai, sihmanhsehlaw tih hlah u. Vawlei cu ka tei cang”. (Jn 16:33)

England ram in USA ram lei ah kal in kuli hlawh ding aa tim mi tlangval pa pakhat a rak um. Aa timhmi tlinh khawh ding caah nifatin a riantuan nak chungin a hmuh mi tangka cheuhra cheukhat kha thingkuang bawm pakhat te aa ser i cu chung te ah cun a sanh zungzal. Kum a vun dih tikah a tangka khonnak thingkuang te cu a vun hon i a tangka cu a rel; “ka khual tlawnnak ding caah a nguh cang,” tiah a ti i tilawng ticket cu a va cawk. Cu lio te ah khua a ruah mi cu “ka ticket caah ka tangka nih a ka nguh, rawl eiding ca ah cun a za lo hi teh,” tiin khua a hei ruah.

A ticket cu aa put i inn lei ah a lawi than i khualtlawn tik lampi ei ding caah tiin a inn i aa chiah mi rawl cheukhat kha bawm pakhat chungah a sanh hna i a thil cu a timh hna. Cuticun tilawng cuan in zing zaan rawl-ei a cut tik paoh ah tilawng hmailei tung pawng te ah a thu tawn i a rawl cu a ei tawn.

Nikhat cu tilawng captain pa nih tlangval pakhat nifatin rawl ei caan paoh ah lawng hmai lei a kal leng mang kha a hmuh. Captain pa nih tlangval pa cu a hei fuh i, “ka fa, ziah lawng chung rawl ei nak khaan chungah ei loin leng ah cun rawl cu na ei lengmang ko,” tiah a hei ti. Tlangval pa nih cun, “Aw, a si. Kei hi USA lei ah riantuan dingin kaa tim i kumpi kum khat chung tangka ka khon. Sihmanhsehlaw ka khon mi tangka nih lawng cit nak lawng a zat i rawl ei nak caah cun a ka zat lo caah hitihin inn in kaa rawnh mi rawl leng ah ka ei nak cu a si ko,” tiah a hei leh. Cutikah captain pa nih a timi cu, “ka fa, ticket na cawk lio i na liam mi tangka chungin khan eidin ding ca zongah telh dih a si cang ko cu ta,” tiah a ti.

Dawtmi u le nau hna, thihnak in a tho than cang mi kan Bawipa Jesuh Khrih nih a kan tlenhnak ah hin zumtu Khrihfa hna caah Thiang Thlarau zong pek kan si cang hna i Jesuh Thawngthabia vawlei cung khuazakip ah phuan ding zongin rian khinh kan si cang (Matt 28:18-20, Lamkaltu 1). Khrihfa kan sinak menmen ah hin i lung si dih rih loin a kan fialmi rian zong tuan khawh i zuam ding a si.

“Tih hlah u! Vawlei cu ka tei cang,” tiah a kan ti tu Jesuh hnu kan zulh nak ah hin Khrihfa mi hna nih kan zumhmi Jesuh Khrih le a cawnpiak nak hna kha kan nunnak ah tuahsernak in langhter ding a si.