Kan NU Mary bangin NUN

“Thanh tuah, ka lungthin, Bawipa lianhngannak cu. I lawm tuah, ka nunnak, Bawipa na khamhtu cungah; A salnu hi hi tluk minauta ka si nain a ka philh lo. Nihin thawk in hmailei ahcun mi vialte nih thluachuaknu an ka ti lai.” (Lk 1:46-48)

Thatnak le dawtnak cu sermi thil nung vialte nih kan duh cio mi a si. Saram hna hmanh nih an fa le kha an nunnak pek sian tiangin an kilven-an khamh tawn hna kan hmuh khawh. Achia a tha a thlei dang thiammi minung hna chinchin nih cun fale hna kha anmah hna nak in thil a ti kho tu le nun zia tha in a nung kho mi an si ding kha an duh deuh.

Nihin cu Bawinu Mary nih Elizabeth sin a va len kai nak puai Bupi nih a kan tuah piak. Nun zia dawh in a nung zungzal mi Mary le Joseph hna nih an fapa Jesuh Khrih kha thatnak he an rak cawnpiak zungzal hrimhrim lai timi cu ahohmanh nih el khawh dingmi a si lo. Zeicah tiah cun nu le pa hna sin in fale hna nih ziaza kan i cawn hna caah a si.

Thatnak vialte hrampi a simi Jesuh zong nih Mary kha kan nih minung vialte hna i NU si dingin a kan pek. Kan NU a simi Mary nih zeitikhmanh ah that lonak le chiatnak kan cung a tlun ding hi a kan duh piak hrimhrim lai lo. Kan NU a simi Mary nih amah bangin nun zia tha he kan nun zungzal ding hi a duh zungzal ko.

Nihin puai kan tuahmi ah kan nih hna zong nih kan NU a simi Mary kha thil tha laksawng pek ve ding kan si. Cucu Pathian cungah zumhnak tling a rak ngeih bangin kan nih hna zong nih Pathian cungah zumhnak tling kan ngeih ve ding a si. Pathian nawl a rak ngaih bangin kan nih hna zong nih Pathian nawl kan ngaih ve ding a si. A thianghlim mi NU a si bangin kan nih hna zong nih a thianghlim mi (purity) nun zia kan ngaih ve ding a si. Tangdornak lungthin (humble service) he midang hna caah zawn ruah bawmh thiamnak a rak ngaih bangin kan nih hna zong nih pakhat le pakhat cungah i theih thiamnak, i bawmh thiamnak lungthin kan ngeih ve ding a si. Cutin kan nun khawh a si ahcun Vancung i a ummi kan NU, a thianghlim mi Pathian i NU fale kan si ko hna lai.

Mary nih Canan thit-umnak puai lio ah sin um hna sin a rak chimmi, “An fial mi hna paoh kha tuah u,” (Jn 2:5) tiah a rak ti hna bang khan, rian a kan fial tu le kan chambaunak ah a kan cawnpiak tu Jesuh Khrih nih a kan fial mi paoh kha tuah khawh i zuamnak in kan NU a simi Mary kha upatnak pe cio hna u sih.