Duhfahnak ngei Hlah u

“Cucaah cun nan nunnak ding ca i nan herhmi rawl le ti kong ah le nan pum ca i nan herhmi hnipuan kong ah lungrethei awlokchong in va um hlah u, kan ti hna. A ngaingai ti ahcun, nunnak hi rawl nakin a biapi deuh lo maw? Cun pum zong hi hnipuan nakin a biapi deuh lo maw? Cucaah thaizing nih lungretheihnak cu a za in aa ngeih ve ko lai. Ni khat nih a chuahpimi harnak cung i a dang chonh chih lengmang hi a herh lo.” (Matthew 6:25,34)

“Lungrethei awlokchong in va um hlah u,” timi ah hin thaizing lei caan caah tuah hnga dingmi rian i ruah cia lo ding le timh cia in um lo dingin a kan cawnpiak duhmi a si lo. Sihmahsehlaw fakpi in duhnak (anxious) ngeih lo ding tu kha a kan cawnpiak duh mi a si. Nifatin kan nunnak ah lungretheih ding mi tete hna le tuah hnga ding mi tete hna cu an um ko hna. Thaizing zeidah kan tuah lai timi chung lawngah ruahnak chiah dih cikcek loin, thaizing tuah hnga ding mi thil hna an tlamtlinnak hnga ding caah thil zeizong vialte a ti kho tu Pathian kha hmasa bik ah chiah ding timi kha a kan cawnpiak duh mi a si. Kan zeizong vialte Pathian sin kan ap hmasat hnu ah tuah hnga dingmi thil hna kha zumhnak fek he tuah ding a si. Pathian bawmhnak kha hal hmasat zungzal ding a si.

Mithiang Paul nih: “Tangka duhnak hi that lonak phun kip chuahnak hram a si. Mi a cheu cu tangka ngeih an duh tuk caah zumhnak kha an kaltak i ngaihchiatnak a phunphun an tong” tiah a ti (1Timothy 6:10).

Mi pakhat khat nih tuah hnga dingmi aa thim tikah(vv.19-24) fakpi in duhnak lungthin ngeih lo ding a si. Jesuh nih phun hnih in a kan cawnpiak. (v.26) “A zuang lengmangmi va khi zoh tuah hna u: thlaici an tuh bal lo, rawl an tuan bal lo, buk zongah an rawng bal lo; sihmanhsehlaw vancung i a ummi nan Pa nih a zohkhenh ko hna, a si ah, nannih cu va nakin nan biapi deuh lo maw?” (v.28) “Cucaah zeicahdah hnipuan kong ah nan lungre a theih? Ramlak i a khomi lili pangpar khi zoh tuah hna ngat u: rian an tuan lo, hnipuan zong zeihmanh an i tah lo”. Zeicah tiah Bawipa Pathian nih a zohkhenh ko hna. “Cucaah zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek thiamthiam ko hna lai,” (v.33).

Paul nih a chim than mi cu: “A Fapa hrimhrim hmanh kha a zuah tung lo kan dihlak caah pei a pek kha! A Fapa kha a kan pek – thil vialte zong hi a lak in a kan pe hnga lo maw?”(Rom 8:32). Cun: “Mi vialte sinah nemnak tein va um u. Bawipa cu tuan ah a ra lai. zeithil kong hmanh ah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u,” (Filipi 4:5-6) tiah a ti.

Dawtmi u le nau hna thaizing caah duhfah tuknak lungput he lungrethei in kan um zungzal a si ah cun nihin tuah hnga dingmi thil hna caah tuah khawhnak thazang kan ngei sual lai lo. Pathian zong kan philh sual lai. Pawngkam a ummi hna zong kan philh sual hna lai i kan mah le kan mah zong kan i philh sual lai. Lunglawmhnak caan hna zong kan philh sual lai i Pathian thangthat zungzal ding kan si mi zong kan philh sual lai. Vawlei chawva thilri duhfah tuknak nih a kan thih ter sual lai.