Innsatu

Catial thiam Edwin Markham nih “Inn satu” timi tuanbia pakhat a rak tial. A konglam cu hitin a si.

Nikhat cu mirum pa pakhat nih fanu fapa tampi he sifak harsa ngaiin a inn pawngah a khua a sa mi tarpa pakhat kha bawmh a duh. Mirumpa nih cun a sinum pakhat kha inn design pakhat he sifak tarpa sinah cun a kal ter i tarpa thithruainak in inn pakhat sak dingin a va pek ter. A chimchih mi cu, “zeitluk hmanh in tangka dih ko hmanh sehlaw, a tha bik mi thilri hna le a thiam bik mi letama hna hmangin na sak lai,” tiah a chimhter. Cun mirumpa nih bia a cah ta mi cu, “Ka khualtlawn a sau rih lai. Tha tein rak sa law ka rak kir than tikah na ka hmuhter te lai,” tiah a ti.

Tarpa nih cun a miak tampi a hmuh hnga dingmi kha aa tuak cia i inn sak hram cu a thawk. Sihmanhsehlaw, a hmanmi thilri hna cu a man a fawi mi hna le man fawi tein hlaan khawh mi letama a thiam tuk lomi hna kha a hman hna. Inn tamhnak thilri hna zong kha a fekmi sii hmang loin thuh sawh khawhmi manfawi sii hna kha a hman hna. 

Mirumpa cu a khual tlawnnak in a rak phanh tikah tarpa nih cun a sak dih cang mi inn tawh kha aa put i mirumpa cu a va ton. “Bawipa na ka chimh, na ka fial bangin inn cu ka lim cang, nangmah sinah inntawh ka rak in ap ko hih,” tiah a ti. Mirumpa nih cun, “A tha, a tha; lungsau thinfual tein le i zuam ngai in na sakmi mah inn hi nangmah le na chungkhar  hna caah a si. Khah! Tu ni thawk in nan chungkhar tein lunglawm thanuam tein le hnangam tein um cang u,” tiah a ti i inn tawh cu tarpa kha a pek than ti a si.

Tarpa cu aa lawm kho ti lo. Zeicah kan ti a si ahcun mirumpa kha a hlen siloin amah le amah aa hlen caah a si. Pathian tih buin le felfai tein rian a tuan lo caah a si. A nunzia le lungput a that lo caah a si. 

Jesuh nih lungcungah sak mi inn bangin kan si dingin a kan cawnpiak (Matt 7:24-27). Pathian tih bu tein le Pathian cawnpiak ning bangin kan nun cio a si ahcun lung cungah sakmi inn bantuk kan si ko lai. Mithiang Paul nih: “Nan nih cu Pathian inn zong nan si fawn. Pathian nih pahrang a ka pekmi kha ka hman i inn sak a thiam ngaingaimi bantukin inn saknak ding a hram kha ka bunh, cun a dang pakhat nih a cungah khan a run sak. Sihmanhsehlaw zeitindah kan sak ti kha ahohmanh kan i ralrin awk cio a si, zeicahtiah Pathian nih Jesuh Khrih lawnglawng cu a hram caah khan a chiah cang i hram dang zeihmanh chiah awk ding a um ti lo,” tiah a ti (1Cor 3:10-11).