Hngalhnak

Nihin ni caah Bupi nih a kan thimpiak mi cathiang cu Jesuh nih Pa Pathian a chawnhbiaknak zultu hna nih an ngaihnak kong a si (Matt 11:25-27). Jesuh nih Pa Pathian a thatnak cungah thangthatnak bia a chimphuannak le mi nih zei an rel lomi hna sinah theih hngalhnak a hmuhsak a langhternak kong hna zong kan hmuh khawh: “Maw ka Pa, van le vawlei a uktu, a fimmi le cathiammi hna sinin na thuhmi kha cathiam lomi hna sinah na langhter caah na cungah kaa lawm,” tiah a ti (Matt 11:25). Ngakchia nih a nu le a pa aa bochan bantukin Pathian cungah zumhnak le bochannak a ngeimi hna sinah Pathian thawnnak le fimnak aa phuannak kha a langhter duh mi a si.

Kan pawngkam ummi si hna seh, vawlei cung sining konglam kan zoh tikah mifim le mi thiam tiah ruahmi hna cu thangthat le cawnglawmh an tong theo tawn. Sihmanhsehlaw fimnak timi le thiamnak timi ah hin phundang sining cio in an um zong hi hmuh le theih khawh a si ko. Sianginn kainak cawnnak chungin thiamnak a ngeimi an um bantukin sianginn kai loin pawngkam thil sining zoh in thiamnak a ngei mi hna zong vawlei cungah tampi an um ko. Nifatin um kal ning chungin thil tampi kan cawn khawh mi hna zong an um. Hitin theih hngalh thiamnak ngeih ruangah Pathian sinah lawmhnak bia na chim bal maw? Pathian na thangthat bal maw?

Jesuh nih kan lungput le kan ruahnak a ngakchiat tuk ding hi a kan duh piak mi a si lo. A kan duh piak mi cu ngakchia hna nih nu le pa hna an i bochan an zumh hna bangin Pathian cungah bochan duhnak lungthin le zumhnak kan ngeih ding tu hi a si. Ngakchia hna nih pawngkam an zoh i hmuh mi thil hna cungah an khuaruah a har thiam bangin Pathian thil-ser mi hna cungah khuaruahhar thim kan herh ve. Cu khuaruahhar nak chungin Pathian sunpar lianngannak kha hmuh thiam ding a si.
Nawl ngeihnak zeizong vialte pek a si cang mi Jesuh kha zoh hna u sih law a chimmi le a phuanmi hna kha ngai hna u sih. Zeizong vialte a ngeimi Jesuh sin in zeihmanh a ngei lomi kan nih hna nih bawmhnak hal zungzal ding a si: “Fapa le an sinah a phuanmi hna dah ti lo nih cun ahohmanh nih Pa kha an hngal lo” (Matt 11:27).