Na Ti Khawh Ko

Bupi nih nihin ni caah a kan thimpiak mi cathiang (Matthai 11:28-30) hi aho paoh nih duh tuk cio mi cathiang a si men lai tiah ka zumh. Hi cathiang chungah kan hmuhmi cu: “Rethei le thilrit mi vialte hna, ka sinah ra tuah u, dinhnak kan pek hna lai,” tiin Jesuh nih a kan sawmnak kong a si. A sin kan kal a si ah cun thazang thar kan pek hna lai tiin a kan sawm mi zong a si.

Chitchat vun i ruat ve hmanhlaw, zeithil hna ni hin dah na nunnak ah harsatnak an in pek i na khing an in rih ter? Zeibantuk lio caan ah khin dah dinh na duh bik caan a si? Taksa lei in pakhat le pakhat i theihpalhnak ruangah a si kho men; dam lo ruang zongah a si kho men; ngeihchiah chawva ruangah harsat ton zong a si kho; rian tamtuk ruangah le lungthin a bat tuk ruang zongah a si kho mi a si. Ahohmanh hi lung retheih nak in a luat kho mi kan um lo. Lung retheih ning a niam-san aa dan, aa lawh lo lawng hi a si ko. Hi lio caan ah hin kan mah te lawng in maw a thli tein kan tuar, pakhat khat sin chimphuannak in dah kan tuar? A si lo ah Jesuh sin ah kal in maw kan sining kan chimh tawn?

Nihin thawngthabia chungah kan hmuh bangin Jesuh sin kan kal tikah direct in kan lung retheihnak hna le kan harsatnak hna an tlau dih colh taktak ko maw? Direct in an tlau dih colh a si ah cun a tha tuk ko hnga. Sihmahsehlaw Bible cathiang chung kan hmuh bang, kan duh ning bang thil an hun si lo caan hi pakhat cio kan nunnak hrimhrim ah ton cio mi an si ko. Retheihnak le harsat nak hna cu kan nun chung paoh hi kan sinah a um peng ve ko lai. Sihmahsehlaw, Jesuh sin kan kal a si ah cun, Jesuh kha kan chimh a si ah cun Jesuh nih intuar khawhnak thazang, veel-thluachuah a kan pek hrimhrim ko lai. Kan mah tein biahal awk a si mi cu: “Jesuh cungah zumhnak fek ka ngei kho tak maw,” timi a si.

Jesuh, Bawipa thisa sinah khan na caan pe law chikhat dai tein amah he um ti hmanh. Zeihmanh chim a hau lo, dai tein a hmai ah khan va thu ko. Na chim hlaan ah Jesuh nih na herhmi vialte cu a theih dih ko. Na herhbik mi zong pek awk ah an hngah zungzal ko. Na lung retheihnak, tihnak, harsatnak na ton mi vialte kha Jesuh kut chungah chia ko. Dai tein Amah kha caan na pek khawh a si ah cun, na thilrit vialte kha a zaan ter ko lai: “Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zaang,”(Matt 11:29-30) tiah a ti.
Kan thilrit cu kanmah lawng nih kan phor lai lo; Jesuh hrimhrim nih a kan phorh pi lai dingmi a si caah, vanram lei hoih in kan khualtlawnnak ah hin nuam tein le khing zaang tein kan kal kho hna lai.