Jesuh Bianabia Hna

Tuzarh chung relmi Thawngṭhabia hna kan zoh tikah “Vancung Pennak kong” fianternak ca dingah  tahchunhnak le bianabia hna tampi hman an si kha kan hmuh khawh. Nihin ni zongah Jesuh nih a zultu hna kha: “Vancung Pennak cu lo chung i thuhmi rothil bantuk a si. Mi pakhatkhat nih a vaa hmuh sual tikah a khuh ṭhan ta tawn. A lung aa lawmh tuk caah a ngeihmi thil vilate kha a zuarh hna i a va kal ṭhan i a lo ning in a va cawk” tiah a ti. Cun Jesuh nih bianabia a peh ṭhanmi cu “Lungvar sung bianabia” a si. A hmutu pa nih khan “a ngeihmi thil vialte kha a zuar i cu lungvar cu a cawk” tiin ngeihmi thil hmansian a si ning kong zong kha kan hmuh khawh than. 

Jesuh nih a pathumnak bianabia in a cawnpiak ṭhan mi hna cu “Sur bianabia” a si. A bia a ngaimi hna kha a ti mi hna cu: “Vancung Pennak cu rili chung i chehmi sur, nga phun zakip a thlaitu bantuk a si. A khah tikah ngatlaitu hna nih cun tikam ah an hnuh i an ṭhu i nga kha an ṭhen hna: a ṭhami cu an bawm chungah an sanh hna i a ṭha lomi cu an hlonh hna,” tiah a ti.

Jesuh nih bianabia tampi hmang in zultu hna kha a cawnpiak hna. A chimhmi hna cu: “Chan donghnak ah cun cu bantuk cun a si lai: vancungmi kha an kal lai i miṭha mi hna lak khan miṭhalo mi kha an khawmh hna lai i meiphu chungah an paih hna lai. cuka ah cun an ṭap lai i an hacang an rial lai,” tiah a ti.

Nihin ni caan zongah Jesuh nih “Rothil Sunglawi” a simi a cawnpiak nak le amah hrimhrim kha kawl cio dingin a kan sawm. Biahal ding a simi cu “Aho khi le zeithil khi dah ka tleihchan bikmi le ka thlah khawh lomi a si? Hi thil hna le minung hna hi ka nunnak a dongh tikah zeitluk in dah ka thlarau caah ṭhathnemhnak an si te hnga? 

Nifatin ka nunnak ah Vancung Pennak co khawhnak nak hnga ding caah zeitlukin dah duhpatnak ka ngeih khawh? Nifatin in teh Vancung Pennak hi ka kawl cang maw? Vancung Pennak cu kan sinah nifatin in a um ko. A kawl zia le hmuh thiamnak fimnak kan ngeih khawh nak hnga ding caah Bawipa sinah thluachuah hal zungzal ding a si.