Ho dah naa thim?

Pawngkam bia hna le forhtu hna ruangah minung nih hin a caan ah cun thil a sining tak tein hmuh thiam lo le hngalh thiam lo tiangin um tawn a si. Zeicah tiah cun mi nih an faak hna nak cung lawngah khan an molh, an rit caah a si. Mah zawn ruahnak lungthin lawng a ngeimi hna ruangah a herh lomi rawhralnak le fahnak mi tampi zong nih an ton theo tawn.  

Nihin kan relmi Cathiang (Matthew 14:1-12) kan zoh tik zongah Herod nih palhnak a tuahnak kong kan hmuh khawh. Jesuh Khrih a nun lio caan ah Herod timi min hi hmun thum ah kan hmuh. Bawhte Jesuh thah dingah a kawltu Herod (Matt 2:16-18), Johan lu a tantu Herod (Matt 14:1-12), Jesuh temhinnak a tuar lio ah Jesuh hmuh a duh ngaimi Herod (Lk 23:6-12) tiin kan hmuh khawh. 

Herod Siangpahrang hna nih hin Pathian thluachuah he aa naih bik nak hmun ah an rak um cio ko hna nain Pathian thluachuah an tlolh i a thluatu lawng te an rak si. Zeicah kan ti hna a si ah cun mah zawn lawng aa ruat mi an si caah a si. Cun mi faak a duh mi lawng an si caah a si. Mah zawn lawng ruah cu Pathian thluachuah hmuh lo nak a si.  

Dawtmi u le nau hna kan nih hna zong Herod bantuk kan si caan a um lengmang ve men lai. Kan pawng te ah Jesuh a um kan hngalh lo caan, tipil petu Johan bantuk in biadik le bia hmaan a chimmi hna kha cohlaan duh hna loin bia hmaan lo le biadik lo a chimmi hna kha kan cohlaang sual hna maw? Kan i thimmi kan palh tikah siseh, a hmaanmi lam in kan pial sual tikah zeitluk in dah kan sungh timi hi kan i thei cio tawn maw? Pawngkam ummi hna zeitluk in dah an ngaihchiat i an mitthli a tlak timi kan hmu thiam tawn maw? 

Herod bantukin kan lung a puam a si ah cun Pathian he kan i hlat lai i a dongh nak ah ngaihchitnak lawng kan co sual lai (Matt 14:9).