Tangdornak Lungthin cu Zumhnak in a rami a si.

Jesuh Khrih hnu zulh ka duh ko tiah timtuahnak a ngeimi hna paoh nih hin pakhat nak bik ah tangdornak lungthin ngeih hi a herh mi a si. Nihin ni caah Bupi nih a kan thimpiakmi cathiang (Matt15:21-28) chungah Jesuh Khrih nih Kanaan minu pakhat a zumhnak a thangṭhat kong

kan hmuh. Mah minu nih hin Jesuh Khrih nih biafak ngaiin a chawnhnak cungah lungfahnak zeihmanh ngeih loin a fanu damnak a hmuh ṭhannak hnga caah faak chinchin tuin a nawl nak kha kan hmuh khawh. Jesuh nih biafak in a chawnh zongah minu nih cun biafak in a let lo. 

Jesuh nih bia fak ngai in a chawnh tikah minu nih hin, “Uico ka si lo, fanu a ngeimi le bawmhnak a herhmi minung ka si. Rak ka neh sawh hlah, hi bangin biachim cu nangmah sin zong in bawmhnak ka herh lo,” tiah bo ngaiin leh khawh a si ko. Sihmahsehlaw Jesuh cungah a zumhnak, aa ruahchannak le a fanu cungah a dawtnak a ngan tuk hringhran caah a minung sinak le zaangder nak hna kha aa hngalh caah a niambik hmun ah amah le amah aa chiah khawhnak hi a si.

Minu nih a leh mi cu, “Cucu a si taktak ko, bawipa; sihmanhsehlaw bawi cabuai cungin a tlami rawl  ṭilṭlawt cu uico nih an ei ve tawn ko hen pei,” (Matt 15:27) tiah a leh. 

Judah mi hna nih zungzal nunnak changreu a simi Jesuh kha an hlawt, an cohlaang duh lo i zeiah an rak rel lo. Cu changreu cu an cabuai tangah a thla, a thlawt i cu a thlawt mi ṭilṭlawt cu gentile mi “miphun dang a simi” hna nih an rak cohlaan. Cucu miphun dang a simi hna nih khamhnak thangṭhabia an rak co nak kha a si.

Minu nih amah sining le dirhmun aa hngalh bantukin kan nih hna zong nih kan sining le kan dirhmun hi kan i hngalh ve ding a si. “Palhnak le sualnak a phunphun ka tuah ko hna nain zei ruangah dah Pathian nih a thluachuah le veel laksawng hi a ka pek peng rih ko hnga?” timi te hi ruah zungzal ding a si. 

Cabuai cungah chiahmi “Rawl” bantuk a simi Pathian thluachuah kha cohlaang thiam hna u sih. Bawipa nih kan thlarau caah ṭhawnnak le damnak pek a kan duh zungzal ko. Pathain fanu fapa si awkah aa tlakmi kan si lo, sihmahsehlaw kan i tlak lo buin a fanu a fapa si awkah a kan thimtu Pathian cungah lawhnak chim zungzal ding a si. Bawpa nih kan thlarau cu ṭhatlonak le Satan kut chungin a kan khamh zungzal ko lai ko lai. 

Jesuh cungah tangdornak lungthin he zumh fek teih um zungzal ko. Na herhbik mi cu pek na si ko lai.