Aho a si nan ka ti dah?

“Vancung Pennak hunnak tawhfung cu kan pek lai i vawlei cung i na hrenhmi cu vancung zongah hrenh a si lai i vawlei cung i na awnhmi cu vancung zongah awnh a si lai.” (Matt 16:19)

Jesuh chan lio i a rak ummi minung hna bang khan tuchan minung kan nih hna zong nih Jesuh hi ahodah a si tak hnga timi ruahnak kan ngei kho cio tawn men lai. Jesuh konglam zong hi Phungchimtu hna, siloah kan hawikom hna sin in kan rak theih hmasat khawh men mi zong a si. A zeiti si ko hmanhsehlaw, pakhat cio kan nunnak ah “Jesuh Khrih hi ahodah a si?” timi hi a biapi deuh mi a si. 

Nihin kan relmi thawngṭhabia (Matt 16:13-23) chungah Jesuh cu Sisaria Filipi khua pawng ram ah khan a va kal i a zultu hna kha “Mi nih Mi Fapa hi aho a si, an ka ti dah?” tiah a hal hna. Zultu hna nih an leh mi cu: “A cheu nih Tipil petu Johan a si, an in ti. A cheu nih, Elijah a si, an in ti, a cheu nih Jeremiah maw profet pakhatkhat dik a si, an in ti,” tiah an leh. Cutikah Jesuh nih zultu hna cu a zoh hna i: “Nannih tah, aho a si nan ka ti dah?” tiah a ti hna. Chitkhat te ah Simon Peter nih Jesuh cu a leh i, “A Nungmi Pathian Fapa, Messiah kha na si,” tiah a ti.

Jesuh nih Simon Peter cu a zoh i: “Johan fapa Simon, mi vanṭha ngaingai na si! Zeicahtiah hi biatak cu minung sinin na hngalhmi a si lo i vancung i a ummi ka Pa nih an pekmi a si. Cucaah cun nang cu lungtum, Peter, na si, kan ti. Cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo,” tiah a ti. Jesuh nih Peter “Lungtum” tiah min a pek mi hi thangṭhat upatnak he a pek mi min a si. “Lungtum” cu ṭhawnnak hmelchunnak zong a si.  

Kan nih hna zong Jesuh cung kan zumhnak nih “Lungtum” bantuk a kan si ter ve. Nifatin kan nunnak ah Pathian cung kan zumhnak ah siseh, kan nun um kal nak ah siseh, lungtum bantukin ṭhawng ngai in kan nun zungzal awk a si. A caan caan ah cun hneksaknak zong ton khawh a si caah kan zumhnak cungah hin fek tein dir zungzal hna u sih. Pathian cung zongah lung awṭawmnak ngei hna hlah u sih. Jesuh nih: “Nannih tah, aho a si nan ka ti dah?”

“Maw Bawipa, ka lungthin cu nangmah nawl zulh a duhmi ah ser ko (Ps 51:12), Na phunglam cu ka chungah chia law ka lungthin cungah ṭial ko sawh.” (Jeremiah 31:33)