Zumhnak in tuahsernak

Zumhnak timi cu minung pakhat a minung sining tak te i a nunnak ah hin hmuh khawh a si. Hi bantuk bia hna zong hi midang caah nunnak peksian tiangin dawtnak a ngeimi paralṭha hna tuanbia dawh le konglam an chimphuan caan ah hin theih deuh a si tawn. Hi bantuk paralṭha hna hi a zei lei in dah midang hna he an i dannak a si hnga? A ruang cu an zumhnak kha ṭhatnak-tuahsernak in an langhter caah hi an tuahser mi nih hin midang lung a ton khawh tuk caah a si.

Nihin kan relmi thawng ṭhabia (Matt 17:14-20) zong nih hin zeidah kan tuah ding le kan zulh ding a si timi kha fiang tein a kan hngalhter ko. Zultu hna nih an ṭhawl khawh lomi khuachia nih a tuahmi pa i a pa cu Jesuh sinah a ra i: “Bawipa, ka fapa hi ka zaangfahpiak tuah. Amah cu mitlu a si i a tluk tikah hin mei chung le ti chung zongah a tlu tawn. Na zultu pawl sinah ka ratpi nain an damter kho lo,” tiah a ti. Zumhnak le bochannak lungthin he a ra mi pa i a thlacamnak cu Jesuh nih direct in a leh colh. Jesuh nih khuachia cu, “Chuak” a ti i a chuak i cu caan thawk te cun ngakchiapa cu a dam colh.

Zultu hna nih cun Jesuh amah lawng a um lio caan ah khan, “Zeicahdah khuachia kha kan ṭhawl khawh lo?” tiah an hal. Jesuh nih a leh mi hna cu, “Nan zumhnak a zat lo caah a si. Anṭam ci tiate hmanh zumhnak nan ngeih ahcun, hi tlang hi, ‘I thawn,’ ti u law aa thawn ko lai. Zei paohpaoh kha nan tuah khawh ko lai,” tiah a ti hna.

Dawtmi u le nau hna, mipa nih a fapa damnak hnga ding caah Jesuh sin ah a kal ngam i a duhmi kha a hal ngam bantukin, kan nih hna zong kan zumhnak kha kan tuahsernak in kan langhter ngam ve a si ahcun kan ram siseh, kan pawngkam ah siseh damnak phunphun a um ko lai. Jesuh he kan kal ṭi, kan ṭuanṭi a si ahcun teinak a phunphun kan hmuh kho ko lai.

Bawipa Jesuh min cu zungzal in thangṭhat si ko seh. Amen