BAWINU MARY VANCUNG CAWI PUAI

Voikhatnak Bible - Biathlam 11:19-12:1, 3-6,10

Psalm - 45:9-11,15 (Lehnak 45:9)

Voihnihnak Bible - 1Korin 15:20-26

Thawngṭhabia - Luke 1:39-56

RUAH DING TETE HNA

1. Catholic Khrihfa pakhat a tling ve mi caah cun Nu Mary kong zumh lo cu a si kho lo. Asinain tlamtling lo Catholic caah cun protestant pawl chimmi te hna khi zumh sual a fawi ngai. RC Bu chungah Popele Bishop te le siangbawi te sualpalh ko hna hmansehlaw Bupi cawnpiaknak cu a palh kholo ti hi hngalhawk a si. Cucaah cun Khrihfa dang he bia i ruah tikah theih fiang lomi le hngalh fiang lomi kha a hngal bantukin pingpalo pi mah ruahnakin chim ding a si lo. Pingpalo pi chim kha sual ngaingai a si. Hngalh cikcekmi lawng kha chim ding a si i ningzah kha biapi ah chiah ding a si lo.
2. Nu Mary kong he pehtlaiin RC Khrihfa tamdeuh cu chimawk kan hngal tawn lo. Bible kan rel lo caah a si. Biathlam ah minu pakhat a lang i a thuam ah Nika a si thlapa kha a ke in aa lamh i a lu ah Arfihleihnih Bawiluchin aa chinh. 12:2 nau a hring dengmang i nau nganfah in a ai. Vancung in a ngan ngaingai mi limkeng senpi .... 12:3 Nau a hring dengmangmi nu hmaiah cun a dir i a fa a chuahcangka ka ei lai ti a duh caah a si. 12:12 Limkeng nih vawlei cungah thlak ka si cang ti a hngalh tikah fapa a hringtu nu kha a dawi colh. 12: 15 Vawlei nih minu cu a rak bawmh. 16 Limkeng cu minu cungah cun a thin a hung ngaingai. Minu tefa a tang rihmi vialte hna doh awkah khan aa thawn. Minu le tefa hna cu Pathian nawlbia a ngai i Jesuh nih a phuanmi biatak zumhawk tlak tein aa tlaihmi kha an si, tiah fiangro in kan hmuh khawh. (Fiang deuh in hngalh na duh ahcun Biathlam 12 : 1 - 17 tiang rel)
3. Moses nih Israel mi pawl a chimhmi hna cu Pathian nawlbia nan zulh dih ding a si. Kan zulh khawh hnga lo ding nawlbia Pathian nih a kan pe lo.
4. Vanram co ding caah zeidah ka tuah lai tiah Jesuh an hal tikah, nawlbia va zul, na innpa kha nangmah naa dawt bantukin va daw hna a ti hna. Ka innpa cu hodah a si an ti tikah Jesuh nih, Samaria miṭha pa tuanbia in a phi a pek hna.
5. Miphun vialte thirfung in a uktu hnga ding a hringtu cu aho dah a si. Mary a si. Fapa cu Jesuh a si.
6. Nihin relmi thawngṭha bia hi a tu le tu rel law Mary a lianngannak kong le Pathian hrimhrim nih a timhmi Nu a sinak kong a lang lai.
7. Jesuh a hringtu le Johan tipil petu a hringtu hna kong fiangte hngalh na duh ahcun Luke 1 : 1 - 80 kha duhsah tein rel.
8. Mary cu a nun chungah soi awk um loin Pathian nawl a ngaih caah a thih tikah a pum he a thlarau he vancung ah cawi a si tiah Bupi nih a kan cawnpiakmi hi duh zongah zumh, duhlo zongah zumh a hau. Aruang cu Bupi cawnpiakmi pupa phungbia le Bible hi zeitik hmanhah aa kalh kho ballo i aa pehtlai zungzal. RC Khrihfa hna caah Bible lawngin tlam a tlin khawhlo caah pupa cawnpiaknak nih a baumi Bible tete kha tlam a tlinter. Pupa phungbia le Bible cu Catholic Bupi nih a tuahmi a si ti hi hngalh zungzal awk a si.
9. Nu Mary sin thlacam hi zeitik hmanhah daithlang hna hlah u sih. Rosary cam i zuam peng u sih. Khamhnak lam ah hnangamnak le daihnak a kan pe tu a si.