Kan Duh a si ahcun kan Hlawt zong a Herh ve.

“Nawlbia cu ka zulh dih cang hna. Zeidah zulh awk ka herh rih?” (Matt 19:20) tiah a ti.

Tuah na duh tuk mi rian le thil hna kha na tuah khawh lo ruangah siseh, cun na hmuh hnga dingmi le na co hnga dingmi thil hna na hmuh lo, na co hna lo tikah na ngeih a chia tawn kho men lai. Cucu mi kip nih ton cio mi le tuar cio mi a si ko. A san deuhnak hmunhma phanh na duh ahcun na khing an rih deuhter tu le tangah an thla kho tu thil hna kha na hlawt, na kal tak ding hrimhrim a herh. 

Kan nunnak ah hin kal tak ding thil tete an um cio ko. Sianginn ca cawng mi pakhat nih mark ṭha tein exam a awn duh a si ahcun nuamh duhnak le lente celh peng duhnak hna kha i sum in ṭha tein a ca a zoh lawngah a awng kho ko lai. Vancung Pennak co kan duh ve a si ahcun mah taksa duhnak kha i sum in Pathian duhnak kha kan tuah, kan zulh ve ding a si. Pathian duh ning in nun dingah kan i thim a si ahcun Satan le a tuahsernak vialte hna kha kan kal tak hrimhrim ding a si.  

Nihin ni caah bupi nih a kan thimpiakmi cathiang (Matt 19:16-22) chungah mirum tlangvalpa kong kha kan relmi a si. Tlangvalpa nih Jesuh sinah a chimmi cu, “Nawlbia cu ka zulh dih cang hna. Zeidah zulh awk ka herh rih?” tiah a ti.  Cu tikah Jesuh nih cun a thawh i, “Mi tling si na duh ahcun, va kal law na ngeihmi thil vialte kha va zuar hna; cun tangka na hmuhmi cu misifak kha va pe hna; cuticun vancung khua ah chawva na ngei lai, cun ra law rak ka zul,” tiah a ti. “Cu bia cu tlangval nih khan a theih tikah ngaihchia in a kal, zeicahtaih amah cu mirum ngaingai a si,” tiin nihin thawngṭhabia kan relmi chungah kan hmuh.

Dawtmi u le nau hna, Pathian kan i thim a si ahcun satan le a rianṭuannak vialte hna kha kan hlawt dih cikcek ding a si. Vancung Pennak co kan duh a si ah cun vawlei cung thilri-chawva le pennak hna kha kan hlawt ding a si. Jesuh Pathian hnu zulh kan duh, a lam kan i thim a si ahcun ruamkai duhnak lungthin kha hlawt in tangdornak lungthin he kan nun ding a si. Chim duhnak cu Jesuh nawl kha kan ngaih zungzal ding a si.