Pathian duh lomi cu hrial ding a si ko

"Phungbia cawnpiaktu saya hna le Farasi mi hna, nan caah ngaihchia a va si dah! Midepde hna. Si rang an thuhmi thlan bantuk nan si. Lenglei cun aa dawh ko, sihmanhsehlw a chung cu mithi ruh le a thumi pei a khat cu. Cu bantuk cu nan si, a lenglei cun mi ṭha ko nan lo, sihmanhsehlaw nan chung cu lih le sualnak in a khat." (Matt 23:27-28)

Nihin ni caah Bupi nih a kan thimpiakmi cathiang (Matt 23:27-32) kan relmi chungah hin Farasi mi hna le Phungbia cawnpiaktu saya hna cungah zei ruangah dah Jesuh Khrih hi hi tluk in a thin a hun hnga? Zeicah tiah cun an chimphuan ning bangin an nun lo caah a si. An miphun hawi hna cung zongah khan “zeitindah thil tuah ding a si, zeitindah um kal ding a si” tiah a chimtu an si ko hna nain anmah hrimhrim nih an tuah fawn lo. A fialtu hmunhma lawngah an um hna i anmah hrimhrim nih cun zeihmanh an tuah duh tak lo.

Lenglei in hmuh khawhmi thil hna cungah ralring ngai in an um ko hna nain (hrukaih-thuam le hmunhma duhtuknak) midang hna cungah khan zeitlukindah harnak kan pek hna i thilrit kan khinh hna timi kha an i hngal lo. Anmah chimmi le thil tuahmi hna lawng kha a hmaanmi ah an rel.

Annih hna nih cun miding mifel ngaimi hna sining le dirhmun khan an i um ter ko hna nain an lungchungah cun zirnak le hakkauhnak lawng tein an khat hna. Anmah le anmah Pathian tluk deng khin an i chia hna i midang hna kha an duh paoh in an tuahto hna. Sihmanhsehlaw hi vawlei cungah zei thil hmanh an hmunh thai dih khawh lo bantukin an ṭhawnnak hna le an thil ti khawhnak an reng hna cu nikhat an tlau ve ko lai. 

Hi bantuk Farasi mi hna le Phungbia cawnpiaktu saya hna sining le lungput hi kan ngei cio hna maw?

Pathian fapa le fanu a simi hna nih cun pawngkam um innpa hna kha kanmah le kanmah kan i dawt bantukin kan dawt ve hna awk a si. Pawngkam ummi minung hna kha duh paoh in ṭhutdir ter ding an si lo. Zeicah kan ti a si ahcun hi bantuk Farasi mi hna lungput hi cu Jesuh Pathian hrimhrim nih a huat tukmi le a duh lomi a si caah a si. Jesuh nih a huat mi kha va tuah citcet lai hlah. Sual phawt na si ve sual lai.