Timhtuahnak

“Cucaah cun, a ni siseh, a caan siseh, nan hngalh ṭung lo caah ralring tein um ko u.” (Matt 25:13)

Lunglawmhnak he a tlingmi chungkhar nuam pakhat a ser kho mi hna sining zoh tikah timhtuahnak ṭha a ngeimi chungkhar an rak si ziar tawn kha hmuh khawh a si. Nu le va ṭhitumh dingin an i timh tikah nu le va sining in chanchung nun khawh dingin biakam timhtuahnak an ngeih bangin Pathian kha an chungkhar ah hruaitu siding in hmunhma zong an pek fawn. Zawtfah caan le sifah harsat caan ah lungthin khat tein intuar ṭi ding zongin biakam nak an tuah. Mah duhnak lawng kha hmai chiah loin an nu asiloah an pa duhnak zulh khawh ding le cohlaan khawh ding zong in timhcia in an um. Cubantuk timhtuahnak ṭha ngeih loin chungkhar dirh aa timmi hna nih cun zeitikhmah ah a nuammi chungkhar an dirh kho bal lai lo. A rauh hlaan ah innchungkhar buaibainak le rawhralnak a tong ko lai. 

Nihin ni caah bupi nih ruah ṭi ding in le thazang lak ṭi ding in a kan thim piakmi thawngṭhabia (Matt 25:1-13) chungah timhtuahnak ṭha a ngeimi ngaknu 5 hna le a dai thlang mi ngaknu 5 hna kong kan hmuh. Hi ngaknu 10 hna nih hin nupi ṭhi tlangval pa zeitik an sin a phanh lai kha an hngal hna lo. An tuah hnga dingmi cu tlangval pa a phanh tiang kha hngah i don ding kha a si ko. 

Tlangau tu nih nupi ṭhi tlangvalpa a phan cang tiin a vun thanh tikah a daithlang mi  ngaknu 5 hna cu an meiinn a mih deng cang caah zinaan a hleiin aa rak i put mi ngaknu fim hna sinah khan zinaan docawi dingin an i tim hna. Sihmanhsehlaw an rak pe hna lo. Zeicah tiah cun an dihlak caah a zaat hna lai lo caah a si. Chawdawr tu ah khan va caw ko u tiah an rak ti hna. Cu ruangah an hngahmi tlangval pa zong an tlolh pin ah ṭhitumhnak puai chung zong ah an luh ter duh ti hna lo. Ngaknu fim mi hna tu cu an hngahmi tlangvalpa he khan innchungah luhnak caan ṭha an ngei hna. 

Timhtuahnak ṭha a ngei lomi hna caah cun innka phihkanh zungzal a si ko. 

Timhtuahnak ṭha ngeih timi cu minung kan nunnak ah a biapi tukmi a si. Bianabia ah ṭha tein ca aa zohcia mi sianghngakchia pakhat nih cun a caminpuai cu ṭha tein a phit khawh ko lai. Timhtuahnak ṭha a ngeimi ralkap pakhat zong nih a ral kha ṭha tein a tuk-a tei khawh ko lai. 

Phungchim dingin aa timmi Siangbawi, Pastor hna zong nih thlacamnak he timhtuahnak ṭha tein an tuah an ngeih hmasat a si ahcun thlarau tampi kha Pathian sin ah an kalpi khawh ko hna lai. Cun taksa dam lo nak ruangah a raoh hlaan ah a nunnak a liam hnga dingmi mizaw pakhat zong nih a thlarau caah timhtuahnak ṭha a ngeih ve a si ahcun zeibantuk ṭihphannak hmanh ngeih loin Pathian sinah dai tein aa din kho ve ko lai. 

Cuasicaah dawtmi u le nau hna taksa caah siseh, thlarua caah siseh timhtuahnak ṭha ngei zungzal hna u sih.