Pakhat le pakhat caah thlacam

Nihin kan theihmi thawngṭhabia (Lk 4:38-44) chungah Jesuh nih Simon nupi nu a zawtnak in a damter nak kong kan hmuh. Nihin kan rel mi thawngṭhabia hi nizaan kan relmi a peh a si i Bawipa nih khuachia a ṭhawl khawh hnu ah zultu dang hna he Simon inn ah an kal hna lio ah a cangmi a si. Simon nih Jesuh sinah a nupi nu damter awkah toidornak lungthin he a nawl a hal ruangah Jesuh nih a hawikom le a zultu a simi Simon inn a panh nak zong a si. Simon nih Jesuh sinah rak nawl hlah sehlaw, asiloah rak chim hlah sehlaw zeitin dah a si hnga? Simon nupi nu cu damter a si hrimhrim lai lo timi cu a fiang mi a si ko. 

Simon nih hi tin Jesuh sinah a hal mi hi kan zoh tikah pakhat cio kan caah lam ṭha taktak a kan hmuhsak nak zong a si. Kan nih hna zong Simon bangin kan pawngkam a ummi kan theih hngalhmi hna caah thla kan campiak ve hna zungzal awk a si. Zeicahtiah cun minung kan si caah taksa he thlarau he damnak kan herh zungzal caah a si.

Cun abikin Khrihfa mi hna nih kan tuah hrimhrim ding a simi cu pawngkam um minung hna kha Jesuh Khrih sinah kan kalpi hna ding le kan phanhter hna ding hrimhrim zong hi a herh tuk hringhran mi a si. Pathian dawtnak le Jesuh dawtnak kha kan theihter ve hna ding hrimhrim a si. 

Simon bangin thla a cammi mithiang Monica zong nih a va pa le a fapa hna caah thla a cam tikah a thlacam theihpiak lawng siloin Jesuh sin ah a va siseh a fapa siseh a phanhter khawh hna. Cuasicaah Jesuh nih kan thlacam nak hi leh loin a kan um piak bal lai lo. A kan leh hrimhrim ko lai. Lungsau tein le tangdornak lungthin he thlacam ding tu kha kan rian a si ko.