Ṭhatnak tuah

Jesuh nih annih cu a thawh hna i, “Bia kan hal hna: kan Phung nih Sabbath ni ah zei tuah dah a kan onh? Ṭhatnak tuah maw ṭhat lonak tuah dah? Mi nunnak khamh maw mi nunnak hrawh dah?” tiah a ti. (Lk 6:9)

Na pawngkam um minung pakhat khat caah thil ṭha a chuahpi kho tu a si hnga dingmi a si tiah theih buin thil pakhat khat aa palhnak cungah khan na el ngam bal maw?

Nihin kan relmi cathiang Luke 6:6-11 chungah Jesuh nih a kut a zengmipa a damternak kong kan hmuh. Jesuh nih hi thil a tuah hi Sabbath ni ah a tuahmi a si. Cucu Farasi mi hna le Phungbia cawnpiaktu saya hna nih thil ṭhalo a tuah tiin an ruahmi zong a si. Sihmanhsehaw Jesuh nih cun ngamh sang ngai in a kut a zengmipa cu a damter ko. 

Jesuh nih Sabbath ni pumhnak inn ah a cawnpiak hna lio ah hin a bik in a cawnpiak duhmi hna le a theihter duhmi hna cu ‘Dawtnak’ kong kha a si. Mizaw damternak tibantuk ṭhatnak tuah cu Sabbath phunglam zulh sawhsawhnak in a ṭha deuhmi a si timi kha a kan cawnpiak duh mi zong a si. Phunglam zulh sawhsawh nak in ṭhatnak tuah a san deuhnak, a sunlawih deuhnak a langhter duhnak zong a si. 

Bawmhnak a herh taktak mi hna kha i hmuhter lo le i theihter loin kan um sual hna maw? ‘Mah mipa/minu cu Zarhpi ni ah i pum loin kha ti, khi tin a ummi a si,’ tiin lenglei zohnak le hmuhnak lawngin midang hna kha kan soi sual tawn hna maw? 

Asiloah Jesuh bangin thildik thil-hmaan a si ruangah le thil ṭha a si ruangah ngamhsang ngaiin pawngkam a ummi hna caah kan tuah, kan dir, kan chim ngam cang hna maw?