Tinhnak ṭha ngeih

Chuah ni sunglawi puai “Birthday” kan tuahmi sullam cu lawmhnak biachim caan, abikin nunnak a kan pe tu Pathian sinah lawmhnak pekchanh biachimnak caan a si. 

Nihin ni ah Bupi nih Bawinu Mary chuah ni “Birthday” puai a kan tuah piak. Mary chuah ni puai tuahnak thawngin Bupi nih a kan cawnpiak duhmi thil tampi a um ko. Bupi hruaitu hlaan lio kan pa le hna nih Mary kong he pehtlai in an rak chim, an rak langhter mi cu, “deirel arfi nih ni a chuah lai caan aa naih cang tinak a langhter bangin Mary chuahnak zong nih a liannganmi Siangpahrang a chuah lai nak a langhter ve,” tiah an rak ti. 

Nihin ni caah Bupi nih a kan thimpiakmi cathiang (Matt 1:18-23) zong nih Mary cu Pathian thimmi nu thiang a si nak kha a langhter ve. Pathian nih Mary a thimmi zong hi tinhnak he a rak thimmi a si. Cucu Mary thawngin Pathian minung cannak i lak in kan sin ah a rat nak hnga ding caah a si. 

Kan nih pakhat cio hna zong hi vawlei cungah hrin kan si ve nak zong hi Pathian nih tinhnak pakhat khat a kan ngeih ve caah a si. Kanmah hna kha hmang in Amah Pathian midang hna cungah aa phuan khawh nak hnga ding caah a si. 

Cun Mary nunzia te hi kan zoh ṭhan a si ahcun Pathian cungah zumhfehnak, a zeizong vialte Pathian duhnak le tinhnak cungah i ap khawh dihnak timi hna zong kan hmuh khawh. Thiang Thlarau thawngin Pathian Fapa ka hrin timi hi Mary nih a theih tukmi a si ko. Sihmanhsehlaw zeihmah i uan-thlarnak ngeih loin, ruamkainak ngeih loin, tangdornak lungthin he zumhfek tein Pathian duhnak lawng kha a rak tuah zungzal tu nu a si. 

Dawtmi u le nau hna Bawinu Mary chuahni sunglawi puai (Birthday) kan tuah lio ah hin puai tuah sawh le puai chungah i tel sawh lawng i tel siloin tinhnak ṭha pakhat khat he telkhawh i zuam hna u sih. Na caah Pathian nih an tinh piak mi zeidah a si? Ruat!