Theipar Ṭha

“Midang sualnak a ngaithiam kho lomi cu Khrihfa an si lo,” tiah Pope Francis nih Santa Martha i Missa thawinak a tuah lio ah a chim bal. Zangfahnak timi cu Khrihfa mi hna i kan theipar a si. Cucu dawtu Pathian sin in a ra mi zong a si. Kan nih Khrihfa mi hna zong nih Pathian zangfahnak kan rak co bangin midang hna cung zongah kan langhter ve ding a si. 

Mithiang Paul nih, “Khrih Jesuh cu misual mi hna khamh awkah vawlei ah a rung ṭum, timi hi ahmaanmi le cohlan awk a tlakmi le zumh awk bia a si. Pathian nih a ka zaangfah i misual mi hna lak i a sual bikmi keimah cungah Khrih Jesuh nih a lungsaunak le a thinfualnak a langhter cu, hmailei ah a hun zum i cu zumhnak thawngin zungzal nunnak a hmumi hna caah zohchunh awk siseh ti kha a duh caah a si,”(1 Tim 1:15-16) tiah a ti. mithiang Pual nih a chim bangin kan nih Pathian zangfahnak a cohlang mi hna zong nih midang hna cungah zangfahnak lungthin ngeih in Jesuh mithmai kha kan langhter ve awk a si. 

Zangfah thaimnak theipar kan tlai kho ve cang maw? tiin biahalnak i tuahawk a si. Kan tlai khawh rih lo a si ahcun Khrihfa, Khrih hnu zul tak kan si rih lo ti kha theih ding a si. Bawipa nih a kan cawnpiak mi cu, “Midang cungah zaanfahnak a ngeimi cu lunglawmmi nan va si dah! Pathain nih an zaangfah hna lai,” (Maṭ 5:7) tiah a ti.

I zaangfahnak le i dawtnak a um lo a si ahcun ral phun zakip an tho zungzal ko lai. Khrih a um lo a si ahcun ‘Dawtnak le Daihnak’ zong an um kho lai lo. Cuasicaah kan nih Khrihfa mi hna kan rian cu dawtnak le daihnak lam a sialtu le rianṭuan tu siding kha a si ko. 

Kan theipar hi zei ko hna dah an si, tiin mah le mah bia hal nak zong tuah ding a si bantukin ‘a ṭha mi theipar, dawtnak theipar, daihnak theipar, zaangfah thiamnak theipar’ thlai khawh ding zong in i zuam zungzal ding a si. Kan duhmi vialte a kan pe kho tu Pathian sin zongah thluachuah hal zungzal ding a si.