Damnak a um ko lai

"Bawipa, na re i theih hlah, nangmah luhnak dingah ka inn hi aa tlak lo. Nangmah nih, 'Dam seh,' hei ti law ka salpa cu a dam ko lai." (Lk 7: 6-7)

Rom ralbawi pakhat nih a dawt ngaingai mi a sinumpa a dam ṭhan nak hnga ding caah Judah mi upa hna kha Jesuh sinah bawmhnak hal dingin a thlah hna nak kong kha nihin ni caah Bupi a kan thimpiak mi cathiang (Lk 7:1-10) a si. 

Hi cathiang chungah Jesuh nih khuaruahhar damnak zei ruangah dah a tuah hnga timi chungin phunthum in ruat ṭi hna u sih. Cu hna cu “zawnruah thiamnak, ziaza ṭhatnak - sining le bochan thiamnak tiin zoh hna u sih. 

Minung pakhat le pakhat cungah ṭha tein zawnruah thiamnak a um a si ahcun cu ka hmun ah damnak zong a um. Rom ralbawipa nih a sinumpa caah zawnruahnak lungthin a ngeih nak thawngin a sinumpa a dam ṭhannak kha kan hmuh khawh. Cu ve bangin kan mah le kan umnak bu chung cio te zongah hin zawnruah piak thiamnak um ve sehlaw lungthin- taksa damnak tampi a um ko lai. Mah zawnruah piak thiamnak te nih khan thil tampi rian a ṭuan khawh timi zong kha theih ding a si.

Ziaza ṭha mi hna umnak hmun zongah damnak a um. Rom ralbawipa ziaza hi nihin kan relmi cathing nih a langhter ning zoh in theih khawh a si. Jesuh Pathian hmanh nih a thangṭhat mi lungput le ziaza ṭha a ngeimi a si. Hi ralbawipa nih lungthin ṭha a ngeih lawng siloin a ngeihmi chawva zong in amah miphun a si lomi miphun dang (midang) a bawm tu zong a si fawn. 

Zumhfehnak le bochannak a umnak hmun zongah damnak a um i khuaruahhar thil zong an cang kho. Zawn ruah thiamnak, ziaza ṭha ngeih le bochannak lungthin (a fekmi zumhnak) na ngeih a si ahcun Rom ralbawipa caah Jesuh nih khuaruahhar thil a tuahpiak bangin na cungah Jesuh nih khuaruahhar thil a tuah ve ko lai. Rom ralbawipa nih Jesuh thil ti khawhnak cungah biatak tein a zumh khawh caah pawngkam a ummi (sinumpa) hna tiangin damnak an hmu khah. Jesuh cungah zumh fek tein um zungzal ko.