Zawnruahnak

“Khua hauka a hei phak ah khin ruak vui awk i a kalmi mirun kha an hung chuak ve. A thimipa cu nuhmeinu fapa a si i amah lawngte cu a fa a si, mi tampi nih khuachung cun nuhmeinu cu an kalpi.” (Lk 7:12)

Nain timi khua pakhat ah a fapa a dawtuk mi nuhmeinu pakhat a rak um. Sihmanhsehlaw a dawt tukmi a fapa nih a thih tak tikah mi tampi nih nuhmeinu cu an zangfah i ruak thlah tik zongah mi runpi nih thlan lei ah an zulh fawn. Cu lio caan te ah cun Jesuh le a zultu hna zong Nain timi khua ah an kal lio a si ve i khua hauka an hei phak ah khin ruak vui awk i a kalmi mirun kha an hung chuak ve i an i tong hna. 

Nuhmeinu nih zeitluk in dah a intuar hnga ti cu theih khawh a si ko. A va nih a thihtak, cun a tu cu a dawt tukmi a fapa zong nih a thih tak ṭhan hoi cang. Ahohmanh bochan awk um ti loin amah te lawng khua sak ding phun a si cang. 

Cio lio te ah cun Jesuh le a zultu hna cu Nain khua an rak panh lio te a si ve caah bawmhnak a herhtuk mi nuhmei nu caah Jesuh a phan ti zongin ti khawh a si ko. Zeicah tiah cun Jesuh nih cun minung hna kan sining le kan herhbik mi hna kha a kan theih piak dih caah a si. Nuhmeinu fapa a thih zong hi Pathian sunparnak aa phuan nak hnga ding caah a si ti zongin ti khawh a si fawn rih. 

Mithipa cu thihnak in Jesuh nih a thawhter ṭhan tikah a hmu mi mizapi cu an khuaruah a har, ṭihnak in an khat i Pathian kha an thangṭhat. “Kan lakah profet nganmi a chuak cang i Pathain nih a mi hna khamh awkah a ra cang,” an ti.  

Jesuh nih nuhmei nu fapa kha thihnak in rak thawhter hlah hmanhsehlaw, Jesuh Pathain Fapa hrimhrim nuhmei nu pawng a umnak te hmanh nih khan nuhmei nu kha tampi hnemhnak le lung damnak a pek khawh ko. Dawtmi u le nau hna harsatnak a tong lio mi hna tampi bawmhnak kan pek khawh hna lo hmanh ah i len kai ding kha philh lo ding a si. I len kai le i zawnruah piak thiamnak te nih hin tampi bia a chim i rian a ṭuan timi zong kha theih ding a si.