Vailam Huham

“Moses nih dar rul kha thetse ram lakah a tar bantuk khan Mi Fapa zong hi tar a si ve lai. Cucaah cun amah a zummi paoh nih zungzal nunnak an ngei lai.” (Jn 3:14-15)

Vailam tung hi Khrihfa mi hna caah cun a biapi tukmi hriam pakhat a si. Zeicah tiah cun Pathian Fapa Jesuh Khrih hrimhrim nih vawlei mi hna sualnak chungin tlanh kan si ṭhannak hnga ding caah vailam kha a rak hman caah a si. Sihmanhsehlaw vailam tung hi Jesuh Khrih nih vawlei mi hna tlanhnak ding caah rak hmang hlahsehlaw san a tlaihnak a um hnga maw? A um hrimhrim lai lo; ningzahnak caah rak hmanmi ningkel khan hmuh a si ko lai. Jesuh Khrih nih kan caah a rak hmanmi a si caah Khrihfa mi hna zong nih kan cohlaan nak hi a si.

Mithiang Paul nih: “Kannih nih cun vailamtahnak cung i thahmi Khrih kong kha kan chim i cu kong cu Judah mi caah cun tluknak lung a si i Grik mi hna caah cun hruhnak bia a si. Sihmanhsehlaw Pathian nih a kawhmi hna caah cun, Judah mi an si zongah Jentail mi an si zongah, cu bia cu Khrih kha a si i Khrih cu Pathian hmual le Pathian fimnak kha a si,” (1 Cor 1:23-24) tiah a ti.

Kannih hna cu sermi minung kan si hna caah nikhat khat cu kan thi ko hna lai. Sihmanhsehlaw vailam cungah thihnak a rak ingmi Jesuh Khrih thawh ṭhannak nih thih a hmangmi kan pumsa cu nunnak amahkhaan nak a pek cang caah kannih hna zong nih kan thih hnu zongah kan nung ṭhan lai, thawhter kan sit than lai timi zumhfehnak a kan ngeihter khawh. Zeiruangah tiah cun Khrih nih hi vailam hmang in thihnak kha a rak tei cang caah a si. Minung hna nih cun vailam timi cu ningzahnak sining ah an rak hmuh ko nain Pathian nih phungdang in a hman ṭhan tikah cun Amahsunparnak langhternak caah le a lianngannak langhter nak caah hman a hung si. 

(Number 21:4-9) Meirul cuknak a tongmi hna nih dar rul kha an zoh tikah damnak an hmuh ṭhan bangin thlarau lei kap in a thi mi hna zong nih vailam zohnak thawngin nunnak le damnak an hmu kho ṭhan ve hna. Jesuh nih Paul sinah a chim bangin a kan chimh cio ve mi cu: “Ka vel hi na caah a za ko, zeicahtiah ka ṭhawnnak cu derthawmnak ah hin a lang,” (2 Cor 12:9) ti kha a si.

Taksa lei in siseh thlarau lei in siseh damnak le ṭhawnnak hmuh kan duh a si ahcun Jesuh le a vailam kha zoh zungzal hna u sih. I bochan zungzal hna u sih.