Jesuh Chungkhar sinak

“Ka nu le ka naule cu Pathian bia kha a thei i an theih bantukin a tuahmi paoh kha an si ko.” (Lk 8:21)

Jesuh Khrih chungkhar si a duh lomi ahohmanh kan um men lai lo. Jesuh he chungkhat si cu kan duh dih cio ko lai. Sihmanhsehlaw Jesuh Khrih he chungkhat si khawh nak hnga ding caah a herhtukmi le a biapi tukmi thil pakhat tuah ding a ummi cu: “Pathian bia kha a thei mi siding le theihmi bantukin a tuahmi siding kha a si” (Lk 8:21). 

Pathian bia kha a thei i theihmi bantukin a tuah kho mi kan si cang hna maw? Bianabia ah Jesuh pekmi nawlbia: “Nan ral kha va daw hna u law an hremtu hna kha thla va campiak hna u,” (Matt 5:44) timi nawlbia kha kan zul kho cang maw? Asiloah kan cung i thil an tuahser ning bangin khan maw kanmah minung sining le duh ning in kan leh ve hna?

Kan minung sining le duh ning lawng kan zulh, kan duhnak lawng kan tuah a si ahcun pakhat le pakhat kar lak ah i rem lonak le huatnak a lian chinchin lai i pakhat le pakhat kan i hlat chinchin ko lai. Mahatma Gandhi nih: “Mit caah mit timi lehrulh cawnpiaknak kan zulh a si ahcun vawlei cung ummi vialte kan mit a caw dih ko lai,” tiah a ti. 

Kanmah duhnak lawng kan zulh a si ahcun Jesuh Khrih he chungkhat siding cu a fawi hrimhrim lai lo. Zeicah tiah cun Pathian kha philh in mah le mah biapi cem dirhmun le sining ah i chiah a si caah a si. Pathian bia a cohlaang i a zulmi hna kha mithiang Paul nih: “Cucaah nannih Jentail mi hna, ramdang mi le khual nan si ti lo; Pathian mi hna he cun laikhat nan si cang i Pathain innchungkhar chung mi nan si cang,” tiah a ti hna (Efesa 2:19).  

Jesuh Khrih he chungkhat si kan duh a si ahcun tangdornak lungthin ngeih in “Pathian bia kha a thei mi siding le theihmi bantukin a tuah khotu siding” kha a herhmi a si.