Pathian Duhmi Tuah 

Sual ngaihchihnak timi cu Pathian sinin sual ngaihthiamnak kan hmuh nak hnga ding caah kan tuah zungzal ding mi a si. “Nan sualnak kha kaltak hna u law Thawngṭhabia kha zum tuah u,” (Mk 1:15) tiah Jesuh nih a kan kawh zungzal ko. Pathiah bia ngaih duh lo le sual ngaihchih duh lo ah teh zeitindah kan si lai? Mithiang Paul nih: “Mi nih a tuhmi cu a zun ko lai. A pumsa duhnak lo ah a tuh ahcun, thihnak kha a zun lai; Thlarau lo ah a tuh ahcun, Thlarau nih zungzal nunnak kha a pek lai,” tiah a ti (Gal 6:7-8).

Nawl ngaih duh lo ruangah le mah duhnak lawng zulh ruangah palhnak lam a panhmi hna kan pawngkam ah tampi kan hmuh bal ko hna lai. Asiloah kanmah hrimhrim zong kan rak si ziar kho. 

Nihin ni caah Bupi nih a kan thimpiakmi cathiang (Lk 10:13-16) ah hin Jesuh cawnpiak mi bia a ngai duhlo mi hna le a zul duh lo mi hna caah “Ṭih nung” a sinak kong kha kan relmi a si. Farasi mi hna nih hin Jesuh cawnpiaknak hna kha ngaih an duh lo. Jesuh nih a tuahmi thil vialte hna cungah zongah khan sual phawt ding caah lam an kawl i an ngiar zungzal fawn. Thil ṭha a si tiah theih ko buin a cohlaang duh lomi hna kha Jesuh nih sual a phawt ve hna (Lk 10:14). 

Kannih hna nih teh thil-dik, thil-hmaan theih ko buin i theihter lo, i hmuhter loin kan um sual tawn maw? “A si, a silo” timi bia kaa khat te nih rian tampi a ṭuan khawh bangin “i theihter duh lo le i hmuhter duh lonak” zong nih thil tampi a canter khawh ve. Jesuh nih: “Nan bia a ngaimi paoh nih ka bia an ngaih a si, an hlawmi hna paoh nih keimah an ka hlawt a si, keimah a ka hlawmi paoh nih a ka thlahtu kha an hlawt a si,” tiah a ti (Lk 10:16).

Nihin ni ah ṭhatnak kan tuah mi hi thih hnu pin lei ca thiang a si timi zong hi theih ding a si. 

I theihter duh lo, bawmh duh lo, ngeihmi thil hrawmh duh ve lo, hmuh ko buin zeirel lo ruangah thih hnu hell chung a phanmi mirumpa kong Jesuh nih a kan cawnpiak mi zong kha philh lo ding a si (Lk 16:19-31). 

Cuasicaah caan kan ngeih lio te ah hin kan sualnak i ngaichih in, pakhat le pakhat cungah kan tuahmi sualnak zong i ngaihthiam in dawtnak lungthin he aa bawm kho tu, Pathian bia a ngai i a zul kho zungzal tu si ding kan herh. Cunsualnak lei ah a kan panhter tu thil ṭha lo vialte hna zong kha hrial khawh nak ding caah Pathian sinah bawmhnak zong hal zungzal hna u sih.